Suenter il Cussegl dals chantuns ha era il Cussegl naziunal decidì da dar dapli temp a projects per energia solara. Auter che previs na duain ils projects betg stuair furnir 10% da l’energia fin la fin dal 2025 per vegnir sustegnids cun raps ord il Solarexpress. Nov sto esser inoltrada la dumonda da fabrica fin la fin da l’onn. La debatta en il parlament n’è dentant anc betg teriminada. En dumondas da detagl ston las dus chombras anc vegnir perina.
Cumissiun responsabla dal cussegl naziunal aveva gia signalisà ses sustegn
A chaschun d'ina saira da discussiun ha Roger Nordmann – cusseglier naziunal dal Vad e commember da la cumissiun d'energia – tradì gia avant la sessiun che la UREK (la Cumissiun per ambient, planisaziun dal territori ed energia) haja decis da sustegnair ina prolungaziun dal Solarexpress. Il Cussegl dals chantuns ha gia decis en chaussa il december.
Per Nordmann èsi cler ch'il Solarexpress haja dà in stausch al svilup da la fotovoltaica, era sche la finamira da 2 Terrawatturas producziun sajan stada utopica.
Sch'ins na cumenza betg, na schabegia mai insatge.
Emprim project en realisaziun: Sedrun Solar
A Sedrun vegn l'emprim grond project solar en Svizra realisà. Quel è vegnì preschentà a la saira da discussiun, organisada da la partida socialdemocratica da la Surselva. Per il mainafatschenta da Energia Alpina, Ciril Deplazes, èsi cler daco che quai ha funcziunà en uschè curt temp.
Nus essan uschè in pitschen gremi ed avain pudì prender spert decisiuns.
Sch'in grond concern planiseschia in'ovra saja quai collià cun dapli administraziun ed ins vegnia perquai betg vinavant uschè spert sco els. Il tempo aut ed il termin per esser a la rait sajan stads ina gronda sfida per tut ils projects. Sch'il Cussegl naziunal decida medemamain per ina prolungaziun dal Solarexpress, dat quai a divers projects la pussaivladad da cuntanscher la finamira d'avair en funcziun 10% da l'ovra sin la fin da quest termin, per survegnir las subvenziuns da la Confederaziun.
Betg emblidar da spargnar energia
A la discussiun n'è d'entant betg mo il producir dapli energia stà in tema, mabain era il spargnar quella nua ch'i va. Andreas Beer, expert e docent per raits da distribuziun ha mussà ch'i na dovra betg mo novas ovras, mabain ch'i dat grond potenzial da spargnar energia en il mintgadi. Isolar meglier las chasas, tschentar giu apparats ch'ins na dovra betg e forsa ina giada desister d'ina activitad fiss tenor l'expert era fitg impurtant per superar ils problems d'energia.
