Benedikt Hänggi aveva 14 onns ed era en l'internat dal collegi Karl Borromäus ad Altdorf, cura che pader Felix ha tramess suenter la duscha tut ils conscolars en lur chombras ed ha cumandà ad el da schubregiar la duscha bluts.
Igl è adina vegnì mender: «El è sa tratg ora e ha masturbà davant mai, el m'ha sfurzà da prender ses member en bucca fin ch'el è penetrà en mai.» Hänggi ha supprimì l'abus decennis a la lunga. Pir avant set onns ha el pudì discurrer cun dunna e famiglia davart quai ed el è s'annunzià tar l'uvestgieu da Basilea. El ha survegnì 20'000 francs satisfacziun.
Zuppentà onns a la lunga
A la scola ad Altdorf uranais lavurava er pader Notker. Sper l'instrucziun manava el era la musica da stuors dals scolars. Documents en maun da la «Rundschau» cumprovan che pader Notker fotografescha plirs scolars bluts sut il pretext ch'el dovria ils maletgs per l'educaziun sexuala. In anteriur scolar scriva: «Jau ma sentiva insaco fitg incapabel da maa defender. Cunzunt cura ch'el m'ha stuschà la pel sur il glogn dal penis.»
Il rectur da quella giada, pader Hugo Willi, saveva dapi il 1975 da plirs cas, perquai che geniturs eran sa drizzads ad el. Malgrà quai ha el scrit dus onns pli tard ad in bab indignà che pretendeva la suspendida immediata dal pader Notker: «Il scolast pertutgà ha commess in sbagl unic da grevezza mesauna (...). Ina repetiziun n'è betg vegnida constatada. Nus n'avain pia nagin motiv da discurrer d'ina predisposiziun malsauna.»
Er il cussegl guvernativ saveva
Il rectur ha infurmà cuntinuadamain il directur d'educaziun da quel temp, il cusseglier guvernativ Josef Brücker, che aveva la surveglianza suprema sur il sistem da scola. Brücker saveva davent dal cumenzament almain dals maletgs da bluts. Er el era da l'opiniun che las «surpassadas» na giustifitgassan betg in'exclusiun immediata da la scola: «Il cumportament da P. Notker sto bain vegnir numnà maldeschent - però strusch chastiabel.»
Tenor documents è Brücker apparentamain vegnì a savair nov mais suenter questa decleraziun ch'il pader aveva era tutgà ils scolars al penis. Entant era il pader Notker vegnì suspendì suenter ch'il bab indignà aveva smanatschà da far publica la chaussa e da far ina denunzia penala.
Reputaziun da la scola valitada pli aut che las suffrientschas da las victimas
Il cusseglier guvernativ e directur da l'educaziun actual dal chantun Uri, Georg Simmen, sa mussa «schoccà»: «Tenor mia opiniun han ins valità pli aut las instituziuns, la reputaziun da la scola e da la baselgia che las suffrientschas da las victimas. Quellas han ins quasi negà.» Sche il chantun Uri vul elavurar sez ils abus, lascha la regenza avert.
Ins vul spetgar tge che resultia da l'examinaziun da l'Universitad da Turitg. Là examineschan actualmain perscrutadras abus sexuals en il conturn da la baselgia catolica. Simmen discurriss gugent persunalmain cun las persunas pertutgadas: «Sche quai sa conferma e sch'i dat anc auters cas, sun jau avert da far ina perstgisa publica.»
«Baselgia sco organisaziun da delinquents»
Gia ussa rugar per perdun vul pader Peter von Sury, ch'è stà ils ultims 17 onns avat da la claustra Mariastein ed è sesì en differents gremis per sclerir abus en la baselgia catolica. «Jau dumond per perdun. Per nossa communitad claustrala, per ils paders che han fatg quai quella giada.» Von Sury sa mussa autocritc: «La baselgia è predestinada da parair sco organisaziun da delinquents, en la quala persunas che commetten tals delicts chattan u han chattà in rom ideal. Els èn vegnids protegids.»
El saja cuntent che sia mamma n'haja betg tramess el en in internat catolic da quel temp: «Jau engrazia a Dieu che jau hai pudì evitar quai.» El spera che las victimas da quel temp s'annunzian ussa per sustegnair ellas en lur elavuraziun persunala.
Pader Notker è mort l'onn passà. Suenter sia suspensiun en il chantun Uri è el vegnì transferì – senza vegnir mulestà da la giustia – ad ina scola secundara en il chantun Soloturn, nua ch'el ha er accumpagnà champs da scolars. Da quest temp n'èn enconuschents nagins abus.
Pader Felix è mort il 1984. Sia victima, Benedikt Hänggi, elavura ses trauma: «Quests maletgs, quai era lura oravant tut da notg, mia dunna m'ha adina puspè stuì svegliar, perquai che jau hai apparentamain sbragì, quests maletgs n'èn mai pli svanids.»