Dapi passa in onn fa stremblir in rapport la baselgia catolica en Svizra: il rapport davart l’abus sexual en ils conturns da la baselgia catolica.
Per blera glieud era lura la mesira plaina. En tut la Svizra èn extradas persunas da la baselgia. Uschia er en las quatter plaivs catolicas a Glion e conturns, raquinta la collavuratura pastorala Flurina Cavegn-Tomaschett.
Blers umans han ditg adia a la baselgia
Ils emprims dus enfin trais mais suenter ch’il studi era cumparì, sajan extradas tantas persunas da las quatter plaivs catolicas Glion, Sagogn, Schluein e Sevgein sco uschiglio durant l’entir onn:
Adina puspè scalinavi a l’entrada e lura savevas exact, oz porta il pot puspè ina brev recumandada e quai muntava lura in’extrada.
In temp cun grondas turbulenzas ed in cun ina gronda malsegirezza tar las parochianas ed ils parochians, di la teologa.
Las cifras nair sin alv han confermà ils suspects
Damai che la tematica era gia enconuschenta oravant tut da la Germania, ch’aveva era gia fatg tscherts studis hajan ins pudì ir da quai anora ch’i na vegn betg ad esser auter en Svizra.
Ma cura ch’ins vesa lura nair sin alv tscherts resultats, sche lura è quai natiralmain schon da quai che scurlatta fitg.
Fertant ch’ils ins han ditg adia, èn auters umans restads ed èn vegnids cun lur dumondas. I sajan stadas dumondas da malsegirtads ma er in basegn da discurrer da sentiments e consternaziuns.
Tuttina, di Flurina Cavegn-Tomaschett, sajan els era vegnids confruntads cun solidaritad:
Umans, ch’èn fitg datiers da nus u da la baselgia, han era vulì far curaschi a nus en quels discurs, han ditg, ah, gea, nus duvrain vus pli che mai.
Quai haja schon gidà en l’entira discussiun, schebain ch’ella sco dunna e laica saja stada in zic main en il focus da tut las reproschas, che sajan vegnidas fatgas.
«Prender posiziun PER las unfrendas, quai fiss atgnamain la tenuta!»
L’abus è era stà tema en il pled sin via da Marcel Köhle. Igl è in veritabel pledoyer a favur da las persunas pertutgadas da l’abus.
L’abus saja in «no-go» absolut, di l’anteriur spiritual ed el pretenda 100% sustegn per ils pertutgads e las pertutgadas. Per far quai bastass tenor el in sguard en la bibla.
En ils evangelis fetschia Jesus attent, ch'i dettia ina responsabladad per ils pitschens e flaivels e ch'ins na dastgia betg far maldiever da quella:
El di: «Tgi che dat stgandel ad in da quels pitschens che crain en mai, per lez fissi meglier, sch'ins pendess ad el ina mola mulin enturn culiez e sfundrass el giufuns la mar.» Quella passascha è per mai in dals pli ferms pleds che la Bibla tradescha a nus da Jesus.
Tge dumondas che Flurina Cavegn-Tomaschett ha sezza envers la baselgia e dapli da la relaziun tranter temp da reacziun e credibilitad da la baselgia ha ella tradì en il discurs cun «Vita e cretta».