Airbnb n'è nagin problem per il Grischun – quai resulta d'in studi da la Scola auta spezialisada dal Grischun SAS a Cuira. Tenor ils auturs na contribueschian plattafurmas online per reservar abitaziuns da vacanzas betg a la stgarsezza d'alloschament.
En intginas citads svizras è la purschida d'abitaziuns sur Airbnb gia reglada via la lescha. A Lucerna per exempel va en vigur il prim da schaner 2025 in'ordinaziun che limitescha il fit da l'atgna abitaziun per turists da transit sin 90 dis per onn – ina mesira cunter la stgarsezza d'abitaziuns.
Per s'infurmar davart la situaziun en il Grischun ha la regenza incumbensà sco menziunà avant circa in onn la Scola auta spezialisada dal Grischun da far in studi davart il svilup da la purschida d'abitaziuns d'Airbnb. Quel ha analisà fin il december 2023 la perioda da l'onn 2016, cura che la plattafurma online è cumparida en il chantun.
Ils resultats dal studi
«La fin da l'onn passà devi en il chantun Grischun radund 184'000 abitaziuns, stgars 5'000 da quellas eran affittadas sur Airbnb, quai correspunda ad ina quota da stgars 3%», declera Gian-Reto Trepp, manader scientific da project a l'Institut per turissem e temp liber. Airbnb n'haja tenor lur avis nagina influenza sin la stgarsezza d'abitaziuns vesì sur tut il chantun, cuntinuescha il coautur dal studi.
En tscherts cas possia el influenzar il martgà d'immobiglias, uschia en tschertas citads u en lieus che vegnan visitads principalmain da turists internaziunals. «Auter che Lucerna u la regiun Jungfrau en la Part Sura Bernaisa po il chantun Grischun far quint cun giasts fidaivels oravant tut da la Svizra e da la Germania che passentan regularmain lur vacanzas en lieus da vacanzas en il Grischun. En la regiun Tavau/Partenz per exempel vegnan purschidas var 3,9% da las abitaziuns sur la plattafurma online. Questa procentuala è cleramain pli pitschna che ad Interlaken, nua che 14% dals alloschis vegnan affittads sur Airbnb e nua che tschertas reglas èn vegnidas introducidas per limitar la purschida e per cumbatter la stgarsezza d'abitaziuns.»
El declera era che Tavau e l'Engiadin'Ota attiran cun San Murezzan e conturns era giasts internaziunals. La culpa per la mancanza d'alloschis na saja dentant betg Airbnb, mabain il dretg da planisaziun, che fa, che regiuns cun ina populaziun stagnonta u che va schizunt enavos na po betg avrir novas surfatschas per novs projects da construcziun. En l'Engiadin'Ota èn var 70% da las abitaziuns secundaras e mo 4,4% vegnan intermediadas via Airbnb.
Las stgarsas d'alloschis en il Grischun n'èn damai betg d'attribuir a las plattafurmas online, resumescha l'expert, mabain a l'attractivitad turistica dal chantun ed il giavisch d'avair ina segunda abitaziun che vegn era considerada sco investiziun. Il dumber d'abitaziuns da vacanzas n'è betg s'augmentà dapi ch'Airbnb è preschent en il chantun. Anzi, la plattafurma online ha reducì las pernottaziuns, en las qualas las abitaziuns secundaras èn vidas.
