A Tavau mancan actualmain radund 300 abitaziuns, uschia Philipp Wilhelm, Landamma da Tavau. I haja bler memia paucas abitaziuns per indigens, per lavurers e per famiglias. Sche la vischnanca vegliar tegnair vinavant l’economia sco ussa, sche calculeschan els da stuair crear 800 abitaziuns fin 2035. Airbnb gioghia er ina rolla en quella problematica, sco Philipp Wilhelm di.
I dat là ina problematica, nua ch’abitaziuns, che pudessan vegnir messas a disposiziun per dar a fit permanent ad indigens, pon vegnir duvradas sur la plattafurma sco abitaziun da vacanzas. Qua ans van a perder abitaziuns.
Mintgin po porscher sia abitaziun sin la plattafurma senza annunziar quai a la vischnanca, er sche tuts fissan obligads da far gliez. Quai munta, che quels na pajan era naginas taxas da osps.
-
Legenda: Ian Spescha
Philipp Wilhelm appellescha a tut quels che dattan a fit abitaziuns sur Airbnb da sche pussaivel porscher quellas abitaziuns ad indigens per far frunt a la mancanza da abitaziuns. Sche quellas abitaziuns savessan vegnir duvradas auter, numnadamain per indigens, sche sminuiss quai gia la problematica.
La vischnanca da Tavau, s’engascha vinavant fitg per stgaffir spazi da abitar per indigens cun differents projects sco era cun crear dapli emprimas abitaziuns.
Dovri ina lescha da regulaziun?
Leschas che regleschan quella purschida pudessan forsa far senn tenor Philipp Wilhelm. Leschas possian gidar, na sajan dentant betg la soluziun finala per quella problematica.
Numer da registraziun
Per far frunt a questa problematica ha la vischnanca decidì avant radund in onn e mez che mintga abitaziun che vegn purschida sin la fiera sto vegnir registrada. Tuts che dattan a fit in'abitaziun, na emporta betg sche sur Airbnb ni sur auters canals, sajan obligads da registrar quai cun in numer.
Cun il numer da registraziun survegnia la vischnanca ina survista sur da la situaziun da quants objects che vegnan purschids sin la fiera ed ha uschia ina controlla. Sin Airbnb datti in caum ch'ins stuess emplenir ora cun il dumber da registraziun e pervia da quest caum che fiss atgnamain obligatoric, datti conflicts cun Airbnb tenor Reto Branschi, manader dil center turistic Tavau Claustra.
Jau na sai betg chapir. Sin tut las autras plattafurmas vegn ella realisada perquai ch’ella è fixada en la lescha. Airbnb na fa dentant nagut per il dumber da la registraziun.
Airbnb sez, na sustegnia betg la vischnanca da metter atras lur pretensiuns.
Airbnb refusa d'introducir il champ obligatoric per il dumber da registraziun.
L'entschatta cura che Tavau ha lantschà dumbers da registraziun funcziunava la collavuraziun cun Airbnb atgnamain fitg bain sco el di. Airbnb haja mess las cundiziuns da rima da Tavau sin lur homepage cun tut las infurmaziuns. Ma dapli n'eran els betg pronts da far e cun quai era er finida la buna collavuraziun tranter Airbnb e Tavau.
Nagina schanza
Empruvà hajan els cun tut las metodas. Schizunt giurudicamain, Airbnb è dentant adina a Brüssel u en l'Irlanda e na vegnian betg pli lunsch. Midar quai saja grev. I na saja betg uschia che nagin dettia en il dumber da registraziun sin la plattafurma d'Airbnb. I haja dà gia ina gronda midada dapi che la vischnanca ha lantschà quest sistem, dentant dettia adina puspè persunas che na fetschian betg quai.
Problematic vegnia er sche insatgi sa registreschia cun in num fictiv. Chattar ora tgi che quai è saja simplamain fitg grev. Bleras giadas vegnian osps tar els en il center turistic e dumondian per la carta d'osps ed uschia sappian els tgi che stettia davos l'abitaziun cun dumandar il osp nua u tar tgi ch’els sajan sut tetg. Els stoppian anc chattar ina dretga schliaziun per quest problem.
Vinavant menziuna Airbnb ch'els infurmeschian regularmain mintga utilisader davart las reglas ed obligaziuns localas ed hajan quellas infurmaziuns visiblas e sin lur homepage. Airbnb realiseschia gia en nov chantuns arranschaments per incassar automaticamain las taxas turisticas e veglia collavurar anc cun auters chantuns.
Sche quai vegnia en il chantun grischun era ad esser il cas, è tenor Reto Branschi dispitaivel. Cunquai che Airbnb na saja uschè betg transparent, na fidia el betg ad els e na veglia betg ina tala automatisaziun. Tenor il manader dal center turistic da Tavau Claustra, stuessan las cifras vegnidas controlladas ferm.