Dar a fit in'abitaziun sur Airbnb a Breil
A Breil a la fin dal vitg si crest la crusch ha Diego Zamuner ch’è sez da Breil in'abitaziun cun ina survista sur l'entira vallada. El n'abitescha dentant betg en quella abitaziun, mabain metta quella sin Airbnb. Sin l'idea da porscher si'abitaziun sur Airbnb è el vegnì tras ses meglier ami.
El è pli raffinà che jau cun chaussas digitalas.
Els hajan gnanc studegià ditg, telechargià l'app, registrà, chargià si fotografias sin la plattafurma, inditgà infurmaziuns ed entschet. Il giuven da Breil ha l'entschatta da la pandemia fatg quella emprova cun Airbnb. Sur la plattafurma dad Airbnb eri il pli simpel ed el haja chattà spert osps.
Boom durant la pandemia
Cunzunt durant la pandemia marschavia bler e quai durant l'entir onn. Igl è stà in grond boom cunzunt durant quel temp, ma quest boom ha laschà suenter puspè e quai senta Diego Zamuner fitg.
Durant la pandemia era la stad sco la stagiun d’enviern. L’abitaziun era adina occupada. Uss èsi vegnì pli grev.
Il boom è cunzunt stà grond durant la pandemia. Enstagl da vacanzas en l’exteriur han ils Svizzers fatg qua vacanzas e quai era a Breil. Perquai n’ha el gì nagins problems d’affittar l’abitaziun. Ussa vegnan persunas da tut il mund. Svizras e Svizzers vegnan plitost rar. Il pli savens èn quai clientas e clients da tschep svizzers che jau hai prendì si en mes alloschi durant la pandemia. Cun quests clients da tschep haja el era fatg las meglras experientschas. Cun quests giasts sa Diego Zamuner che tut funcziuna senza incaps.
Experientschas
Saja cun osps internaziunals u cun Svizzers, Diego Zamuner ha fatg fitg differentas experientschas. Adina n'eri betg legraivel per il locatur da Breil, el haja dentant er gì bunas experientschas ed haja el gì ed uschia er chattà clientella da tschep nua ch'el sa ch'els van enturn bain cun l'abitaziun.
Miserias ha el quasi be gì cun giuventetgna ni e cun glieud da l'exteriur. Glieud giuvna fetschian festas en l'abitaziuns. Quai èn muments nua che Diego Zamuner studegia duas giadas daco insumma far vinavant cun Airbnb. El na pretendia atgnamain betg bler da ses osps, dentant quai ch'el pretenda fiss bel sche vegniss tegnì en e guardà in pau dal material. Sias pretensiuns scrivia el adina er en ses inserat uschia ch'i saja er visibel per tuts.
Ussa stoppia el anc ponderar tge far en il futur. Far vinavant ni terminar cun Airbnb.
