La sessiun d’october dal Cussegl grond è averta. En ses pled d’avertura ha il president dal Cussegl grond Franz Sepp Caluori appellà a las deputadas ed ils deputads da far attenziun da l’economia, l’ecologia ed il sectur social – il fundament per ch’il Grischun possia prosperar.
In’incumbensa ch’il Cussegl grond possia mo realisar ensemen, perquei dovria era debattas, quellas stoppian però esser constructivas, uschia il gastronom e president da l'uniun Gastro Grischun vinavant.
Ils gronds temas mancan
Ils gronds temas mancan questa sessiun, quai na munta però betg ch'i vegnia lungurus. Radund trenta tractandas stattan sin l'agenda da questa sessiun; tranter quellas però be ina singula lescha – numnadamain la lescha areguard l'administraziun digitala. Entras quella duai vegnir stgaffida la basa legala per la digitalisaziun dal chantun. Discussiuns na vegnì però strusch a dar. Ch'il Grischun sto far vinavant cun la digitalisaziun è strusch dispitaivel, interessant è plitost la dumonda co e cun quants daners. Lezza dumonda vegn però tractada il december.
Mancanza d'abitaziuns ed Airbnb
La mancanza d'abitaziuns en il Grischun vegn er questa sessiun a fatschentar il Cussegl grond. Tranter auter vul la PS che la regenza examinescha Airbnb, l'interpresa per prender e dar a fit abitaziuns. Ella duai examinar sche Airbnb ed autras plattafurmas digitalas per reservar abitaziuns da vacanzas influenzeschan la disponibladad d'emprimas abitaziuns. Er ils effects da las plattafurmas, ch'èn entant etablidas cumplainamain, han per l'hotellaria ed en general per la valurisaziun turistica.
Er l'Allianza dal Center prenda en mira la mancanza d'abitaziuns. Ella pretenda che la regenza formuleschia in'iniziativa dal chantun cun la finamira per dapli libertad tar la planisaziun dal territori. La Confederaziun stoppia laschar tantas libertads sco pussaivel als chantuns; cunzunt sch'i giaja per la reducziun da zonas da bajegiar ed il bajegiar ordaifer da zonas da construcziun. La regenza grischuna fa però gia ordavant attent che tschertas pretensiuns n'hajan naginas schanzas sin plaun naziunal.
Il cumbat cunter rodas da vent
La PPS sa dosta cunter il plan directiv dal chantun. Quel stgaffescha la pussaivladad da construir rodas da vent en 25 territoris. Per la PPS è quai insupportabel. Ils parcs da vent èn sapientivamain planisads datiers dad abitadis. Quai per cuntanscher meglier els cun vias e raits d'electricitad.
Tenor la PPS fetschian quels però donn al turissem ed a la natira. Ord quest motiv pretenda la PPS ina distanza d'almain 1000 meters tranter roda da vent e chasada - n'emporta betg sch'ella vegn duvrada temporarmain u permanentamain. La regenza na vul però savair nagut da quai e propona da refusar l'incumbensa.