Airbnb - Las opiniuns sa dividan areguard l'Airbnb e ses effect

Situaziun dad Airbnb en il chantun Grischun

Las opiniuns sa dividan areguard Airbnb

I dat chombras u entiras abitaziuns dapertut nua ch'ins less e quai tut a dubel. Cunzunt en lieus turistics datti massa Airbnb's. Joshua Verhoeven, il president da l’associaziun da locataris, è da l'opiniun che Airbnb influenzescha la fiera da abitaziuns. Quant ferm è dentant in'autra dumonda.

Reto Nick, il manader da l’associaziun Grischuna dals proprietaris da chasas è dentant d'in'autra opiniun davart l'influenza dad Airbnb.

Tenor el èn anc auters facturs almain uschè gronds motivs ch'i mancan abitaziuns per indigens. Per exempel che la populaziun vegn adina pli veglia e che adina dapli persunas stattan persulas en abitaziuns. Ma Reto Nick sco era Joshua Verhoeven vesan la problematica tar secundas abitaziuns che na vegnan betg duvradas da possessurs e be purschidas cun in per clics sur Airbnb. Quella varianta saja pli lucrativa per ils possessurs ed è in dals motivs, pertge che quellas abitaziuns na vegnian betg messas a disposiziun per indigens. Uschia na sajan quellas er betg suttamessas a tantas leschas e prescripziuns.

Leschas sco soluziun?

Ina pussaivladad per far frunt a quest problem fiss cun leschas. A Lucerna per exempel datti gia ina lescha che restrenscha Airbnb. Proprietaris astgan dar a fit lur abitaziun maximalmain per 90 dis l'onn sin plattafurmas sco Airbnb. Uschia ina sumeglianta lescha, pudess tenor Joshua Verhoeven da l'uniun dals locataris era far senn en il Grischun.

Cun far pli pauc attractiv da dar a fit abitaziun a curta vista e pli attractiv a lunga vista, pudess quai stgaffir plaz per famiglias, indigens u lavurers. Ma, tuts na vesan quai betg uschia. Reto Nick, il manader da l'associaziun Grischuna dals proprietaris da chasas na vesa ina lescha cun quella finamira betg sco soluziun.

Chantun stoppia gidar

Ina soluziun generala na dettia betg. Era sche Reto Nick e Joshua Verhoeven èn da differentas opiniuns han els tuttina in patratg communal e quai è ch'il chantun stoppia vegnir activ. Fin ussa bittia il chantun il bal adina vi a las vischnancas. I stoppia dar dapli plaz per construir e quai per indigens e betg be per secundas abitaziuns. Sco omadus menziunan stoppia il chantun gidar che associaziuns possian metter a disposiziun dapli abitaziuns per pretschs ch'ins possia er pajar.