Esser schef n'è betg pli per forza in siemi per la giuventetgna. In studi, realisà dal biro da recrutaziun Robert Walters en il Reginavel Unì, vegn a la conclusiun che 52% sut 30 onns na vulan betg daventar schef ud scheffa. Plinavant: 16% dals dumandads refusassan schizunt mintga funcziun che cumpiglia la gestiun d'ina squadra.
Pli baud definivan ins il success cunzunt via la lavur. Oz han ils giuvens in’autra relaziun cun il job.
Adrian Schwery è in dad els. Oz è el independent, pli baud manava el in’agentura da communicaziun. Ma il pensum da lavur, la chargia mentala ed il management da team eran memia bler. «Jau ma regord anc dal di, cura ch’igl era la fin. Jau era levgià. Ins ha damain tema, damain quitads. Jau pens che mia sanadad spiertala saja engraziaivla che jau hai bandunà il post da schef», uschia Schwery en la Televisiun da la Svizra franzosa RTS.
La relaziun tar lavur è sa midada
Quest fenomen, numnà «conscious unbossing», sa declera tras il svilup da la relaziun a la lavur tar las generaziuns novas, explitgeschan Elodie Gentina, professuressa da marketing a la Scola auta d’economia IESEG e perscrutadra cun accent generaziun Z, envers RTS.
Daco che giuvens vulan buc pli ir en il management: «Pli baud sa definiva ina vita da success cunzunt cun la lavur. La lavur aveva prioritad, l'interpresa purscheva tut, in salari per vita duranta. Oz han ils giuvens dentant in'autra relaziun cun la lavur. Per els è impurtanta ina vita accumplida. La lavur è ina part da quella, ma betg pli l'unica cumponenta.» Tenor ella fa quest svilup senn: «Covid n’è bain betg stà l’impuls per tut, ma i ha chaschunà dumondas en connex cun homeoffice, dumondas davart il senn e la midada ecologica. I vegn vitiers ch’ils giuvens pon ozendi articular cleramain tge ch’els vulan.»
Render pli attractiv ils posts da manar
Quest svilup inquietescha las interpresas. La generaziun Z vegn pli veglia ed insacura a stuair surpigliar ils jobs da cader. Intginas firmas han perquai gia inizià midadas per render pli attractivs quels jobs. La Posta è ina dad ellas. «Nus purschain las posiziuns da cader a temp parzial u sco co-direcziun. Quai pussibilitescha da mantegnair ual questa ballantscha tranter la vita privata e la professiun», declera Laurent Tornare, il responsabel per la acquisiziun da talents tar la Posta. Questa ballantscha è stada essenziala per Adrian Schwery. El n'excluda betg da turnar in di puspè en il management, ma el faschess bler auter. «Ins po s'imaginar interpresas cun in pau pli paucs managers e dapli orizontalitad per integrar dapli collavuraturas e collavuraturs en il process da decisiun.»
Per Elodie Gentina ston ins midar er ils process da recrutaziun che na correspundan betg pli exnum a la societad dad ozendi: «Nus stuain reponderar la moda e maniera, co che nus manain discurs da recrutaziun. Ins pudess far quels en furma d’ina tura d’interpresa per inscuntrar il team e betg mo la partiziun da persunal. U ch’ins pudess dar dapli valur al process d’integraziun, surlavurar ils programs da scolaziun, garantir ch’ils giuvens pon far dapli iniziativas en l’interpresa.»
Leger l'artichel original dad RTS
.