La «Hamilton Company» è la patruna da var 3'000 persunas sin tut il mund. En la direcziun da l'interpresa internaziunala cun ragischs en ils Stadis Unids da l'America sa chattan tschintg persunas; Trais dad ellas èn Steve Hamilton e ses dus fegls Robert e Matthew Hamilton. In ulteriur schef è Andreas Wieland, il CEO ad interim da la Hamilton Panaduz – e la tschintgavla persuna en la direcziun è la «President Hamilton Services AG» e CFO Gianina Viglino-Caviezel.
La dunna da 37 onns cun ragischs sursilvanas e surmiranas maina ussa gia dapi dus onns tut ils servetschs interns e las finanzas da l'interpresa. Ina posiziun che blera glieud cuntanscha – sche insumma – per il solit pir cun 50 onns e dapli.
Ella era dentant mai interessada vi d'in post sco scheffa. Sia motivaziun saja adina vegnida dals temas e dal gust da pudair avair in «impact». Quai haja adina manà ella tar ses proxim pass. E ch'ella ha oz la posiziun ch'ella ha – haja da far cun enorm blera lavur, di la dunna ch'è creschida si a Favugn e Tavau. Ch'ella ha quest «drive» è sa mussà gia baud: Sco studenta a la HSG aveva ella fundà ina firma, che cusseglia anc oz interpresas en chaussa «persistenza». In tema che stat fitg a cor ad ella. Uschia ha ella per exempel – per sia dissertaziun – era stgaffì in model che gida ad interpresas ad agir pli persistent. Ed era tar la Hamilton s'engascha ella trasor per che l'interpresa sa meglierescha cuntinuadamain en quest reguard.
Ella vegnia vairamain mintga di gugent a lavurar. Tuttina dovra era ella in equiliber. Quel dat ad ella sia famiglia cun ses um e lur dus uffants. Ella e ses um stoppian esser enorm organisads per pudair reunir lur duas carrieras e la vita da famiglia. E malgrà ch'els dus hajan carrieras sumegliantas vegnia ella trasor dumandada, co che quai saja insumma pussibel da far: Avair ina tala carriera e famiglia. Ses um haja mai da dar resposta a talas dumondas. Ella chatta bain impurtant ch'i dettia exempels da dunnas che mussian che quai saja pussibel. Ella spera dentant fermamain che quai saja bainbaud normal en nossa societad, uschia che mintga famiglia possia viver uschia sco ch'i funcziunia per ella – senza pregiudizis. Per vegnir a quest punct dovria dentant anc ina massa. Da vart da la politica, però era da vart da las interpresas, che stoppian porscher models flexibels er a lur persunal da cader.