La generaziun pli giuvna ha autras aspectativas ed autras pretensiuns. Il martgà da lavur è sa midà. Pli baud èsi stà difficil d'insumma survegnir ina plazza d'emprendissadi, ozendi èsi grev da chattar persunal. Gist quai è stà il tema da la dieta d'expertas e d'experts a Cuira.
Jànos Bucher, manader da las finanzas tar la firma Neoviso e Lisa Rekalic, emprendista tar la Banca Chantunala Grischuna, han represchentà la generaziun Z.
Il giuven da 24 onns sa precis tge che la generaziun Z spetga. El di ch'els apprezieschian l'avertadad e la flexibladad, sco era la communicaziun directa. Ch'il martgà da lavur è sa midà, senta era Jànos Bucher. Ses frar per exempel haja gì fitg simpel da chattar ina plazza d'emprendissadi. Quai als dettia in grond avantatg. Ch'els nizzegian dentant ora quest avantatg, neghescha Lisa Rekalic.
Nus na nizzegiain betg ora quest avantatg. Nus essan simplamain conscients da nossa valur e n'acceptain betg l'emprima plazza.
Tge che saja dentant vair saja che la generaziun Z haja aspectativas pli grondas. Per esser attractiv per la generaziun giuvna dovria ina buna atmosfera da lavur. Quai è impurtant per tuts dus, Lisa Rekalic e Jànos Bucher. Igl è bel sch'ins va a lavurar e l'atmosfera è buna, di Lisa Rekalic. Era per Jànos Bucher èsi impurtant ch'ils emprendists e las empendistas n'hajan betg tema da far in sbagl.
Ils dus giuvens dattan tut per sclerir malenclegientschas tranter giuven e vegl.
Vista da las generaziuns pli veglias
Ils patruns e las patrunas da lavur sentan ch'els ed ellas ston s'adattar. Quai fan els cun tadlar ils giavischs da la glieud giuvna. In basegn da la generaziun Z è per exempel libertad. Els giavischan dapli vacanzas e dapli temp liber. Er Melanie Salis, commentatura da la dieta d'experts, meglierescha quai en ses manaschi.
Ils giuvens din schon tge ch'els vulan – ins sto be tadlar!
In'auter aspect impurtant saja la communicaziun averta. Sa barattar cun ils giuvenils e tschertgar savens il discurs direct. Ella vul serrar la largia tranter las generaziuns.
Sumegliant vesa quai era Tamara Kühne, responsabla per la furmaziun professiunala tar la Banca Chantunala Grischuna. Er ella lavura permanentamain vi da sa meglierar. Ella è stada ensemen cun l'emprendista Lisa Rekalic tar la dieta da spezialists. Ella di ch'il contact tranter las generaziuns saja fitg impurtant.
Quai è in process current – nus vulain ans meglierar e lavurain permamentamain londervi.
Quai para era da funcziunar bain. Tuttas duas din ch'ellas hajan fatg experientschas positivas. Ellas din era ch'il respect vicendaivel saja impurtant.
In'ulteriura persuna che senta questa midada demografica è Maurus Blumenthal, directur da l'Uniun grischuna d'artisanadi e mastergn ed organisatur da la dieta d'experts. El ha sez era gia fatg experientschas cun la generaziun Z en il martgà da lavur.
El di che la generaziun giuvna saja fitg motivada, ch'i dovria dentant tschertas premissas per ella. El senta la gronda midada, era cun la digitalisaziun.
Ozendi è il consum da medias bler pli activ – pli baud guardav'ins simplamain televisiun.
I saja magari difficil per la generaziun pli veglia da s'adattar, di el. Per Maurus Blumenthal è questa dieta d'experts necessaria per educar patruns e patrunas da lavur. El vul unir las generaziuns.
Ils patruns ch' èn preschents èn tuts d'accord ch'il respect vicendaivel è essenzial. La generaziun Z vul vegnir respectada ed udida, din els. Ils temps sa midan, ils umans sa midan, il martgà da lavur sa mida – e tenor Maurus Blumenthal èsi adina da suandar quella midada e s'adattar al temp.