Las generaziuns han mintgamai bler da dir sur d'in l'autras. E mintgina ha ses stereotips, che nus avain rimnà qua. Actual fatschentan cunzunt els, ils Boomers e las Boomras.
Babyboomers
Naschids suenter las grondas guerras mundialas tranter 1945-1965. La via ha parì d'esser libra per adina dapli progress e prosperitad. E per tge n'è quella generaziun insumma betg responsabla? La stgaudada dal clima, mancanza da persunal qualifitgà, ed uss er anc la 13avla renta d'AVS?
Generaziun X
Er numnà la generaziun da «MTV», naschida tranter 1965-1980. Ella ha dà perditga da la tschentada sin la glina ed era da la catastrofa da Tschernobyl. In pau pli sceptica saja ella pia, ed er pli attenta d'avair ina ballantscha tranter lavur e vita privata.
Generaziun Y
Er numnà «Millenials». Els enconuschan per gronda part las medias socialas ed ils computers dapi lur uffanza, han anc dà Nintendo e Moorhuhn. Naschids tranter 1981 e 1995, han els fatg l'experientscha vi da l'agen corp da la midada dal clima. Els vulan, uschia il clisché, far insatge che fa senn en lur vita e mettan anc dapli paisa sin ina ballantscha tranter lavur e vita privata.
Generaziun Z
Ils Digital Natives. Els tschantschan englais da pitschen ensi, han gia cun 12 onns chanals e followers. Tge ch'els faschessan, sche lur telefonin n'avess betg pli battaria, è grev da dir. Probablamain giessan ellas en il center da fitness u faschessan digital detox.
Generaziun Alpha
Suenter 2010 vegn la nova generaziun numnada «Alpha». Emprimas supposiziuns èn, ch'els vegnian ad esser anc pli fitg ina part d'ina cultura d'internet globala.
