Tenor ils resultats da la retschertga che la gasetta ha publitgà la sonda, vulan 57 pertschient dals dumandads che las premias sa basian sin las entradas. Che quels che gudognian bler duain pajar pli autas premias da la cassa da malsauns – è tenor la retschertga betg mo il giavisch da simpatisants da la sanestra e dals verds. Era var mintga segund simpatisant e simpatisanta da l’Allianza dal Center e dals Verdliberals è da quest avis – e perfin 51 pertschient dals simpatisants da la PPS.
Blers vesan las famiglias sut squitsch
Per dus terzs da las persunas dumandadas èsi tenor la retschertga il pli urgent da distgargiar las famiglias finanzialmain – cun levgiar il squitsch tras las premias da la cassa da malsauns. Sco segund suondan las mesiras per procurar spazi d’abitar pli favuraivel. E tar la dumonda tgi che haja pli gronds problems finanzials cun viver en Svizra, las persunas pensiunadas u las famiglias – vesa ina maioritad pli gronds problems tar famiglias.
La retschertga cun il titel «Uschia pensa la Svizra» ha l’institut da perscrutaziun Sotomo fatg per incumbensa da la gasetta «Blick». En tut ha l’institut dumandà 6’066 persunas cun dretg da vuschar da la Svizra tudestga e da la Svizra franzosa.
Declerà curt e cumpact – las premias:
