L'onn proxim s'augmentan las premias da cassas da malsauns en media per 8,3% en il chantun Grischun. Tgi che vul spargnar tar las premias ha differentas pussibilitads. Qua chattais Vus ils quatter tips ils pli impurtants per restar schanegià tant sco pussaivel dal schoc da las premias.
Tip 1: Midar ad ina cassa da malsauns pli favuraivla
Ina cassa da malsauns favuraivla as chatta il meglier tar il calculatur da premias online da la confederaziun. Quel è liber da reclama ed independent. I sa cusseglia dentant da betg midar tschorvamain a la cassa la pli favuraivla, surtut sch'igl è impurtant per in servetsch da clientella bain cuntanschibel e per ina bunificaziun speditiva dals quints dal medi.
Tar retschertgas da cuntentientscha da clients, sa tschentan las uschenumnadas cassas bunmartgadas dapi onns sin las ultimas plazzas. Tar l'Assura per exempel va tenor atgnas indicaziuns var 30 dis, fin ch'in quint dal medi vegn pajà enavos. La gronda part da las autras cassas liquideschan quai en 10 dis.
Tip 2: Augmentar la franschisa
Da principi rendan be la pli auta franschisa da 2’500 francs e la pli bassa da 300 francs. Las franschisas amez na rendan betg, damai ch'il rabat è memia pitschens. Per ils uffants è recumandà d’eleger la franschisa la pli bassa, perquai che els ston ir tar il medi pli savens. Tar la franschisa la pli auta survegnan ins sur 100 francs rabat sin la premia mensila. Per far quai ston ins però er esser abel da pajar 2'500 francs plus la resalva persunala da 700 francs. Quai vala be la paina, sch'ins è sauns u sauna e sch'ils agens custs da sanadad per onn èn pli bass che 2000 francs. Per persunas cun malsognas cronicas u per persunas che ston prender regularmain medicaments chars è la franschisa la pli bassa da 300 francs la dretga.
Tip 3: Eleger models da spargn
Tgi che na less betg auzar la franschisa po eleger in model da spargn tar la cassa da malsaun. Tar il model da medi da chasa as sto en cas da problems da sanadad adina l'emprim sa drizzar al medi da chasa. L'elecziun libra dal medi è cunquai restrenschida. L'uschenumnà model da telmed funcziuna sumegliant. Qua han ins adina l'emprim da telefonar ad ina hotline medicinala, avant ch'ins po ir tar in medi. En las citads dettia anc uschenumnadas praticas da HMO. En quellas praticas èn plirs medis e medias sa mess ensemen per far ina cuminanza da praticas. Persunas assicuradas HMO ston adina l'emprim consultar questa pratica da cuminanza. Persuenter èn las premias tar tut ils models da spargn circa 20% pli bassas.
Tip 4: Excluder in accident
Tgi che lavura dapli che otg uras per emna è assicurà automaticamain cunter accidents sur il patrun. Perquai na dovran ils emploiads nagina assicuranza cunter accidents tar la cassa da malsauns. Auter èsi per exempel tar scolaras e scolars: Els ston s'assicurar cunter accidents en il rom da l'assicuranza obligatorica da malsauns.
Or da l'archiv:
