Mo mintga terza persuna ch'avess la pussaivladad da spargnar cun midar la cassa da malsauns, fa era quai. Cun midar tar la cassa da malsauns la pli bunmartgada, pudess inqual chasada en Svizra dentant spargnar plirs tschients francs per mais. Quai mussa ina retschertga da la plattafurma online Hellosafe.
Plinavant cusseglian plattafurmas sco Comparis u Moneyland da mintgamai tscherner la pli auta u la pli bassa franschisa. Per persunas creschidas na sa pajan franschisas tranteren betg. Ina plattafurma per cumparegliar premias da la cassa da malsauns porscha la Confederaziun: Sut priminfo.ch pon ins chattar la pli bunmartgada cassa en ses chantun.
Tenor Hellosafe ha la premia da quest onn en media muntà a 377 francs per chau. Per l'onn che vegn quintan experts danovamain cun in augment marcant da las premias. Oz suentermezdi dat il minister da sanadad Alain Berset enconuschent las cifras concretas per il 2024.
