La mesadad da la stad meteorologica è gia istorgia e blers han il sentiment ch'i n'haja betg propi dà blers dis cun aura da stad. En il nord èn las temperaturas stadas 0,5 grads sut la norma dals davos 30 onns, en il sid 1 grad sut la norma, sco SRF Meteo scriva.
Sch'ins cumpareglia dentant las temperaturas d'enfin ussa cun ils onns 1961 enfin 1990 – la norma ch'è pertutgant il clima pli relevanta – lura sa mussa in auter maletg. En il nord èsi stà 1 grad pli chaud ed en il sid radund 0,5 grads pli chaud. Las datas pon dentant variar tenor lieu. A Cuira sa mussa la situaziun in pau auter:
La primavaira aveva anc cumenza a Cuira cun temperaturas da record:
Il plaschair dals ins ed il displaschair dals auters
Da la vart davant da las zonas da pressiun bassa sur l'Atlantic hai tuttina dà singuls dis da chaliras. Enfin uss è la temperatura maximala, cun sustegn da favugn, tar modests 33,5 grads – mesirà ils 15 da fanadur a Cuira. Prendì il cas ch'i na vegn questa stad betg pli chaud, lura fiss quai la pli bassa temperatura maximala dal 21avel tschientaner. Il record d'enfin uss è dal 2001 cun 34,1 grads ch'ins ha mesirà a Ragaz Bogn.
Ils pli blers dis da chaliras hai dà enfin uss a Sitten (en il Vallais) cun 7, suandà da Cuira cun 6. Per cumparegliar: la stad 2023 han ins registrà en tut 24 dis da chalira.
Tranter inundaziuns e relaziuns plitost sitgas
Ils maletgs da las malauras en la Mesolcina, en la Val dal Maggia, en il Mendrisiotto ed en il Valais han ins pudì vesair dapertut e quels han per part era fatg tema. A Coldrerio ed a Stabio, en il Tessin dal sid, han ins mesirà durant l'emprima mesadad da la stad 455 millimeters plievgia. Quai correspunda entaifer 45 dis tranter 25 e 30% da la quantitad da plievgia annuala. I dat dentant era lieus cun pli pauca plievgia durant l'emprima mesadad da la stad 2024, per exempel a Berna, Basilea, Locarno e Sitten.
Co sa mussa la segunda mesadad da la stad?
Ils proxims dis vegni bain ad esser chaud, per part schizunt fitg chaud. Tenor ils meteorologs na pon ins dentant tuttina betg quintar cun ina zona da pressiun auta stabila. Quai munta ch'ins sto adina puspè quintar cun plievgia ed urizis che pon tut tenor chaschunar donns.
