A Delémont en il chantun Giura ha MeteoNews mesirà 25 grads curt suenter mesanotg, igl è stà in'uschenumnada notg da tropas (temperaturas betg sut 20 grad l'entira notg).
En tut èn en 10 chantuns vegnids mesiradas temperaturas sur 25 grads la sonda passada. Il pli chaud èsi stà a Basilea-Binningen cun 28,8 grads celsius.
Chaud vent dal sid
Purtà questa chalira en la Svizra ha il vent da las Subtropas che saja tenor MeteoSvizra extraordinariamain chaud. Las temperaturas èn tenor Daniela Schmucki da SRF Meteo «extraordinarias». A Mustér è la media da l'avrigl normalmain tar var 11,5 grads. Ed a Cuira saja normalmain enturn 16 grad chaud durant l'avrigl. Temperaturas sur 25 grads valan sco temperaturas da stad, e quellas èn gia vegnidas cuntanschidas en plirs lieus sonda da mezdi.
En Grischun essan nus 10 fin 13 grads sur la media a lunga vista.
A Cuira ha la temperatura la sonda surpassà il record d'enfin qua dal 1968 per bunamain in grad. Igl è stà 28,5 grad chaud, il record da fin qua è stà 27,7 grads. Er sin il Weissfluhjoch (2'700 meters sur mar) è la pli auta temperatura da l'avrigl vegnida surpassada cun 8,3 grads (record enfin uss: 7,8 grads, 1971).
Il 2023 è stà globalmain il pli chaud onn dapi il cumenzament da las mesiraziuns. Cumpareglià cun avant il temp d'industrialisaziun è la temperatura d'aria globala en media stada bunamain 1,5 grads pli auta. Er la temperatura da l'aua da las mars è stada en media il 2023 lunsch sur las temperaturas mesiradas enfin qua.
Segns da dumonda tar sablun da Sahara
Cun il vent na vegnia betg mo la chalira, ma er pulvra da la Sahara. Quant aut che las temperaturas van lura propi, dependa dentant er dal sulegl. E quai dependa puspè ferm dal sablun da Sahara. Il sablun blochescha numnadamain in pau ils radis dal sulegl. Tenor Daniela Schmucki na dettia betg uschè bler sablun sco durant ils dis da Pasca.
En Grischun stoppian ins dentant surtut la dumengia e proxim glindesdi quintar cun il sablun – e cun quai cun mobiglia dad iert tschuffa.
