Plievgia, fradaglias e vents tutgan plitost tar l'avrigl. Quest onn ha questa aura però cuntinuà fin il matg – quai che n'è betg tipic per il matg en il Grischun, di Felix Blumer, meteorolog tar SRF Meteo. El di ch'i saja stà grisch en tut il chantun ed haja gì bleras nivlas.
Il sulegl ha propi sa fatg stgars.
En blers lieus avevan ins mo dus terzs dal sulegl ch'ins spetga durant il matg. En l'Engiadina saja stà plitost sitg, di el. En il sid dal Grischun hai però vesì ora tut auter – en il Puschlav haja pluvì bler. Sin il Pass dal Bernina hai dà 200mm precipitaziuns. Quai èn 25% dapli che normal.
Il mais passà vesev'ins mo darar il sulegl ed igl ha pluvì bler. Tuttina n'eran las temperaturas betg uschè bassas sco quai ch'ins pudess spetgar, di el. Il cunfin da naiv saja stà magari aut, sin 2'500 meters sur mar. Felix Blumer di, ch'il matg quest onn saja stà plitost chaud. Il matg saja stà in mez grad pli chaud che la referenza dal 1991 – 2020.
Er ils proxims dis èsi da quintar cun plievgia, di il meteorolog. Per vesair in zichel dapli il sulegl ed uschia pudair giudair stad saja anc d'avair pazienza. Ma i dat speranza per dis pli chauds cun dapli sulegl.
I dat fitg blers indizis che l'aura vegn pli miaivla a partir da mesemna proxima.
El di, ch'i va in mument fin ch'i vegn chaud. Ma el s'imagina che l'aura vegnia a partir da mesemna proxima ad esser pli chauda. E quai na pertutgia betg mo il Grischun, mabain l'entira Svizra. Forsa ch'igl è prest uschè agreabel che nus pudain metter nossa giacca en stgaffa e pachetain ora las chautschas curtas.
Nagins quitads pervi d'inundaziuns en il Grischun
En blers lieus dal grischun regia tenor indicaziuns da la confederaziun in privel moderà per innundaziuns. Tenor Gian Darms – expert per privels da la natira tar l’uffizi per guaud e privels da la natira – saja quai nagina raschun d’as far quitads. Ins na giaja betg or da quai ch’il vegnia a dar pli gronds eveniments sin pli gronda surfatscha. Quai surtut pervia d'in grond avantatg: perquai ch’il cunfin da naiv saja actualmain plitost bass, dettia er precipitaziun en furma da naiv. Tuttina cusseglia l’expert d'evitar rivas da flums ed auals che mainan blera aua.