Surtut en il Tessin hai pluvì ferm
En plirs lieus en il Tessin han las grondas massas da plievgia cun granella han chaschunà impediments ed auas grondas en il Tessin – quai tranter auter sin l'A2 tar Bellinzona, sco quai ch'il TCS ha annunzià. A Magadino hai dà la sonda passa 37 millimeters plievgia aifer 10 minutas – la terz auta valur ch'è insacura vegnida mesirada en Svizra. Donns pli gronds n'hai dentant betg dà, uschia che la polizia ed ils pumpiers n’hajan betg stuì intervegnir. Quai ha confermà la Polizia chantunala. En consequenza è er l'evacuaziun per las zonas da privel en la Val Maggia vegnida abolida.
Ma er en la Svizra orientala ha ina front d'urizis procurà per plievgia intensiva e granella. En la Val dal Rain èn plantas sa derschidas tetgs èn vegnids stgarpads davent è bleras vias èn vegnidas inundadas pervia da chinettas stuppadas.
Plievgia senza fin
Tranter 5 e 40 millimeters plievgia hai dà – tut tenor lieu – enfin la sonda en il Grischun, di Jürg Zogg, Meteorolog da SRF Meteo. Il privlus na saja betg la plievgia, mabain la summa da la plievgia. Perquai che l'aura saja gia daditg uschè inconstanta.
Quai possia ins er spetgar sonda saira: «En intgins lieus poi dar anc ina giada 20 enfin 50 millimeters plievgia en il mender cas. Quai pudess localmain esser memia bler, uschia ch'auals van puspè sur las rivas ed ch'i dess sbuvaditschs.» La fin saja dentant visibla, suenter mesanotg giaja a fin cun la plievgia ed uschia er cun il privel.
Regiun Moesa sa prepara
L'ultim urizi en la Moesa saja stada in toc mender, e plinavant sajan ins er preparà questa saira. «En il mument guardi or uschia ch'i na vegnia betg uschè nausch, di Philippe Sundermann, il pledader da medias da la Regiun Moesa. En il mument possia ins star ruassaivel. Ins saja pront sch'insatge schabegia.
Stemprà en il Tessin
La plievgia intensiva ha puspè tutgà il chantun Tessin: In tarment urizi ha furià la bun'ura cun spertadads da vent da passa 100 kilometers l'ura, ha Meteo Svizra scrit via la plattafurma X. Auter che l'emna passada èn ils donns però stads limitads. En intgins lieus è l'electricitad crudada ora.
Era pertutgadas èn las regiuns da Lugano ed il Mendrisiotto. En plirs lieus han ils ferms vents derschì plantas sin las vias, ha la polizia chantunala communitgà. Privels d'inundaziuns e bovas regia plinavant per il mument era en la Bregaglia, la regiun da San Murezzan e la Val Stussavgia.
Bova ha emplenì il batschigl da segirezza a Martina
Diversas chasas al vest da la fracziun Martina en la vischnanca da Valsot èn vegnidas evacuadas gievgia saira preventivamain pervia da plievgia ferma. En tut nov persunas han stuì bandunar lur chasa. La via communala tranter Chanvers e la fracziun Martina è vegnida serrada or da motivs da segirezza. Quai ha il president communal la vischnanca da Valsot – Victor Peer –communitgà. Las mesiras valan actualmain enfin sonda a bun'ura.
In'ulteriura fin d'emna cun urizis spetga
L'uffizi federal per meteorologia avertescha d'ulteriuras malauras en parts dal Grischun, Tessin ed en la Svizra franzosa. I saja puspè ina situaziun d'aura tendida, di er Luzian Schmassmann da SRF Meteo.
«Ils urizis vegnan a cumenzar il venderdi da bun'ura dal Tessin en direcziun Mesolcina e da là en tschellas parts dal Grischun.» Uschia avertescha er Meteo Svizra d'in grond privel da plievgia intensiva en la regiun da San Murezzan e la Val Stussavgia.
La pli blera plievgia spetga Schmassmann en la Mesolcina, dentant er en la Bregaglia, a Poschiavo, a Rheinwald ed er en parts da l'Engiadin'Ota. E cunzunt cun la blera plievgia ils davos dis possia quai vegnir privlus.
Cun quellas quantitads d'aua na pon ins betg excluder aua gronda, inundaziuns e sbuvadas.
L'entira situaziun d'aura tegnia anc enfin la notg sin sonda, lura vegni puspè pli ruassaivel. La sonda èsi lura mo pli localmain bletsch.
Or da l'archiv:
