Heinz Huber daventa nov president da la Banca Chantunala Grischuna. La regenza grischuna ha elegì Huber per la proxima perioda d'uffizi. El cumenzia sia lavur il prim da fanadur 2025, scriva la regenza. Heinz Huber succeda a Peter A. Fanconi ch'aveva annunzià la stad passada da sa retrair da ses uffizi . La regenza grischuna haja elegì Huber sin basa da sia experientscha da blers onns en la branscha da finanzas. Tranter auter è Huber dapi il 2019 CEO da la Banca Raiffeisen Svizra.
Huber aveva gia supiglià il post tar la Raiffeisen suenter il scandal cun il Ex-CEO Pierin Vincenz . Avant era el president da la direcziun da la banca chantunala turgoviana ed ha fatg ses emprendissadi tar la UBS. Ch'el banduna ussa la Raiffeisen saja ina surpraisa ed i dat er vuschs fitg criticas. Sia colliaziun cun il Grischun haja el cunzunt pervi da sia segund’abitaziun.
Temp da transiziun suenter scandal enturn Vincenz tar la Raiffeisen
Il mars 2019 – curt suenter che Huber è entrà en uffizi – ha la gruppa Raiffeisen stuì annunziar ina reducziun massiva dal gudogn per l'onn da gestiun 2018. Engrevgià il resultat han quella giada cunzunt correcturas da valitaziun per las participaziuns ch'èn vegnidas surpigliadas sut l'anteriur schef dal concern Pierin Vincenz. Il gudogn da la gruppa è sa reducì per 41% sin 540,8 milliuns francs.
L'onn avant che Huber ha cumenzà è per la Raiffeisen stà in onn da refar e nov'entschatta suenter il scandal cun l'ex CEO che ha scurlattà la gruppa da bancas. En connex cun las surpigliadas da firmas duai Vincenz avair s'enritgì persunalmain. L'avrigl 2022 è el vegnì sentenzià pervia da defraudaziun, falsificaziun da documents e fraud. Ils 20 da favrer 2024 ha la Dretgira superiura dal chantun Turitg dentant annullà puspè la sentenzia ed ha returnà la procedura a l’instanza precedenta. La Raiffeisen ha sut Heinz Huber extendì ils ultims sis onns tut ils secturs da fatschenta. Ils retgavs da la gruppa han cuntanschì l'onn passà 4,1 milliardas francs. Il gudogn ha la Raiffeisen Svizra augmentà sin 1,39 milliardas. La gruppa da bancas organisada sco cooperativa cun stgars 220 bancas Raiffeisen occupa passa 11'000 collavuraturas e collavuraturs.
Fanconi resta tar la GKB fin che Huber vegn
La Banca Chantunala Grischuna aveva communitgà la fin da fanadur ch’il president da la banca Peter Fanconi sa retiria anticipadamain. Oriundamain era Peter Fanconi vegnì elegì per ina terza perioda d’uffizi dal 2022 fin la fin da mars 2026.
Fanconi è sco ultim vegnì sut squitsch en connex cun la concessiun da credits dispitaivla da la GKB a la
gruppa d'immobiglias austriaca Signa
da l'investur René Benko. Il rapport d’examinaziun en chaussa aveva dentant
distgargià il president
. Huber che ha in'abitaziun secundara en il Grischun è vegnì elegì da la regenza grischuna sco nov president per ina perioda d’uffizi dal fanadur 2025 fin la fin dal zercladur 2029. Per garantir ina transiziun senza interrupziun vegn Fanconi a restar vinavant president da la banca fin la fin da zercladur 2025.
La survista dal di cun las pli impurtantas novitads per tadlar curt e cumpact.
Per pudair abunar quest podcast duvrais Vus ina software cumpatibla cun podcast u ina app. Sche Vossa app n'è betg en la glista sura, lura pudais copiar la feed URL manual en Vossa app da podcast u software.