La dretgira districtuala da Turitg ha decidì che Pierin Vincenz saja culpabel en plirs puncts: Tranter auter duai l'anteriur schef da la banca Raiffeisen avair sfraudà spesas e cugliunà en connex cun transacziuns da firmas. La dretgira condemnescha el a 3 onns e 9 mais praschun. Cunquai che l'um oriund d'Andiast en Surselva ha gia passentà 106 dis en arrest d'inquisiziun, vegnan quels tratgs giu.
Plinavant datti in chasti cundiziunà en daner da 280 schurnadas a 3000 francs. Pierin Vincenz sto era pajar enavos a la banca Raiffeisen bunamain 300'000 francs spesas nungiustifitgadas e restituir profits illegals, resp. donns ch'el ha chaschunà a la Raiffeisen ed a l'Aduno. En plirs puncts è l'um da 66 onns dentant era vegnì declerà liber, damai ch'i n'è betg gartegià a la procura publica da preschentar mussaments concrets. Malgrà ch'el aveva pretendì in chasti da sis onn praschun, è il procuratur public Marc Jean-Richard-dit-Bressel cuntent cun la sentenzia.
Tut auter l'advocat da Pierin Vincenz, ch'è trumpà.
Questa sentezia è faussa.
Curt suenter che la sentenzia è vegnida enconuschenta, ha el annunzià da far recurs. «Dapli na datti betg da dir», uschia Lorenz Erni. Pierin Vincenz sez n'ha betg prendì posiziun.
L'advocat aveva pretendì durant il process che ses mandant vegnia declerà liber. Ed er Pierin Vincenz sez aveva durant il process bain concedì d'avair fatg sbagls durant ses 20 onns tar la banca Raiffeisen e da mintgatant avair surfatg – tuttina n'haja el mai fatg insatge illegal.
Visitas en cabarets n'èn naginas spesas
Durant l'avertura da la sentenzia oz a Turitg han ils derschaders crititgà vehementamain la moda e maniera co Vincenz ha nudà sias spesas: Las bleras visitas en locals da striptease e cabarets «na sajan betg stads en l'interess da la Raiffeisen». Questa tenuta – da nudar talas extradas sco spesas – giaja memia lunsch.
Er tar las participaziuns vid firmas haja Pierin Vincenz mussà per part ina gronda energia criminala. En general saja sia culpa «considerabla» ed el haja malduvrà sia posiziun da confidenza. Ils derschaders accentueschan dentant era che nagins «simpels burgais» sajan vegnids donnegiads e che la banca Raiffeisen n'haja betg gì ils dretgs mecanissems da controlla.
Er Stocker sto ir en praschun
Er l'anteriur schef dad Aduno, Beat Stocker, è vegnì condemnà perquai ch'el haja cugliunà tar differentas transacziuns da la firma. El sto ir per 4 onns en praschun.
La procura publica argumentescha, d'avair constatà in muster criminal. Ils dus accusads sajan sa participads a firmas, senza far transparent quai. Silsuenter hajan Vincenz e Stocker vendì questas firmas a Raiffeisen ed Aduno. Cun questas cugliunarias hajan els donnegià lur patruns da lavur e sez fatg gudogns.
Vai vinavant fin a Losanna?
La sentenzia n'ha anc nagina vigur legala. Igl è da quintar ch'ils accusads tiran vinavant quella a la dretgira superiura da Turitg e tut tenor perfin al Tribunal federal. Fin uss n'èn els anc betg s'exprimids uffizialmain - l'advocat ha be annunzià quai curt enten bandunar la dretgira oz. Enfin ch'i dat ina sentenzia definitiva na ston Pierin Vincenz e Beat Stocker dentant anc betg ir en praschun.
Cun la sentenzia dad oz va a fin in dals gronds process en Svizra: Durant otg dis han ils derschaders interrogà ils accusads e perditgas ed ils advocats han preschentà lur pledoyers.