La procura publica dal chantun Turitg n'accepta betg la decisiun da la Dretgira superiura turitgaisa. Ins fetschia recurs davant Tribunal federal, communitgescha la procura publica. Ina repetiziun da l'entira procedura, che fiss fitg pretensiusa, na saja betg inditgada.
La renfatscha ch'in accusà n'haja betg chapì l'acta d'accusaziun, perquai ch'ella na saja betg vegnida translatada per Franzos na lascha la procura publica betg valair. El haja confermà durant la procedura d'avair survegnì l'acta, chapì ella ed el haja discutà quella cun ses advocats.
Era la pretensiun che l'acta d'accusaziun saja stada memia vasta n'accepta la procura publica betg. Ins haja vis durant la procedura, che tut las partidas hajan chapì quella, ed hajan fatg dumondas detagliadas latiers. Plinavant n'haja betg ina da las partidas duvrà quest argument per las dumondas da renviada.
Dretgira annullescha sentenzia cunter Pierin Vincenz
Avant dus onns è Pierin Vincenz vegnì sentenzià . La Dretgira superiura turitgaisa ha uss annullà questa sentenzia. Plinavant datti indemnisaziuns da plirs millis francs per l'anteriur CEO da la gruppa Raiffeisen ed ulteriuras persunas accusadas. La raschun per l'annullaziun sajan sbagls da procedura gravants. Sbagls sajan capitads en connex cun l'udida giuridica, vul dir il dretg da pudair s'exprimer tar renfatschas. Plinavant na correspundia er l'acta d'accusaziun betg a la lescha. La procura publica sto inoltrar ina nova accusaziun. Las finanzas da Pierin Vincenz ed ulteriuras persunas na vegnan però betg dadas liber, quellas restan pia bloccadas e betg accessiblas.
Dretgira superiura crititgescha l'acta d'accusaziun
Ils suandants puncts èn tranter auter decisivs per annullar la sentenzia:
- L'acta d'accusaziun saja per part uschè vasta ch'ella surpassia il rom legal
- Pervi da l'accusaziun vasta saja stà marcantamain pli grev per las persunas accusadas da sa defender a moda effectiva durant il prim process.
- Ina persuna accusada da lingua franzosa haja survegnì be extracts da l'accusaziun translatads. Quai na bastia betg. Quai violeschia fermamain il dretg da l'udida giuridica e l'obligaziun da fairness.
L'annullaziun entras la dretgira superiura è ina decisiun tecnica. Quai vul dir ch'ella na tracta betg la dumonda schebain las persunas èn culpablas u betg. I vala vinavant la presumziun d'innocenza.
«Nauscha lavur da la procura publica»
L'analisa en chaussa dal directur da l'institut per dretg d'economia, Peter V. Kunz, na lascha enavos in bun purtret da la lavur da la procura publica. Quella haja fatg nauscha lavur, ha ditg l'expert en in'intervista. I saja en emprima lingia penibel per la giustia en il chantun da Turitg. I saja in problem per l'image sche la dretgira superiura ha da dir a la dretgira districtuala e a la procura publica ch'i n'han betg sut controlla la chaussa. Dentant èsi era char. Turitg sto surpigliar custs d'advocats da 400 000 francs. Era per ils atgisads saja quai ina situaziun dischagreabla – ussa va tut anc pli ditg.
Sentenzia pervi da cugliunaria en la dimensiun da milliuns francs
A Vincenz e Beat Stocker ha la procura publica renfatschà d'avair sa participà ad interpresas, e silsuenter guardà che la Raiffeisen ed Aduno cumprian questas interpresas. E Stocker e Vincenz n'hajan betg fatg transparent lur participaziun vi da questas interpresas. La sentenzia da l'avrigl 2022 muntava a trais onns e nov mais praschun per Pierin Vincenz. Gia il schaner passà aveva sia defensiun annunzià da far recurs suenter ch'els avevan survegnì l'argumentaziun da la sentenzia.
