Curt e concis
- La procura publica da Turitg ha avert ina procedura penala encunter Pierin Vincenz. Ad el vegn renfatschà in'administraziun nuncorrecta tar Aduno.
- En il rom da l'examinaziun dal cas han ier gì lieu perquisiziuns da chasa. Tar quellas hajan ins chattà material da cumprova.
- Il cas è vegnì extendì: er cunter quatter ulteriuras persunas da ses conturn professiunal vegn examinà.
La procura publica per delicts d'economia dal chantun Turitg ha la mesemna avert ina procedura penala cunter Pierin Vincenz. Ad el vegn renfatschà in'administraziun nuncorrecta tar la societad da cartas da credit Aduno.
Examinà na vegn però betg mo cunter l'anteriur president dal cussegl d'administraziun, mabain er cunter quatter ulteriuras persunas en ses conturn professiunal. Tranter quels è er in segund anteriur commember dal cussegl d'administraziun.
Persquisiziuns hajan furnì material da cumprova
Il mardi avevan las procuras publicas da Turitg e da Son Gagl manà tras perquisiziuns da chasa al lieu da domicil sco era en ils biros dals tschintg pertutgads. Tenor communicaziun hajan ins pudì segirar material da cumprova fitg vast. Ins saja anc vidlonder d'interrogar il cas.
Dal president tar il sclaus tar il denunzià
Basa per las retschertgas saja stada la denunzia d'Aduno cunter ils dus anteriurs commembers dal cussegl d'administraziun il december 2017.
Vincenz aveva lavurà sco president dal cussegl d'administraziun tar l'Aduno. Il zercladur è el vegnì sclaus sco commember dal cussegl d'administraziun da la societad da cartas da credit.
Vincenz vul sa dustar
Vincenz sa dosta cunter las renfatschas. El vegnia a far diever da tut ils meds che stettian a disposiziun ad el per sa dustar. El saja stà schoccà cura che la polizia saja stada tar el a chasa per manar tras ina perquisiziun.
Jau hai adina respectà l'interess da las interpresas per quellas che jau hai lavurà. Ed jau sun persvadì che jau n'hai betg am fatg culpaivel per insatge.
RR novitads 11:00
