Passa 160 ulteriuras unfrendas d'abus sexual èn s'annunziadas suenter la publicaziun d'in studi il settember. Sulet en l'uvestgieu Cuira èni stà 21 persunas. En tut ils uvestgieus svizzers hai dà bleras annunzias da tutta sort abus.
En il studi da l'universitad da Turitg ch'è vegnì publitgà il settember han istoricras ed istorichers cumprovà passa 1'000 cas d'abus, ed accentuà ch'il dumber zuppà saja anc bler pli grond. Dapi l'entschatta da l'onn è in segund studi en lavur.
Sulet en l'uvestgieu Basilea èn 92 persunas pertutgadas s'annunziadas dapi il settember 2023. Per cumparegliar: En l'entir temp d'uffizi d'uvestg Felix Gmür èsi stà 183 en tut.
Tar ils cas en l'uvestgieu da Cuira vai per renfatschas da mulestas sexualas enfin violaziuns. Bunamain tut ils cas giaschan en il passà, per part sajan els capitads avant 70 onns. In cas saja actual.
