Ils 24 da november èn Svizzers e Svizras puspè clamads a l'urna. Sin nivel federal datti quatter votaziuns:
- Finanziaziun unitara da las prestaziuns da sanadad
- Cumplettaziun da las vias naziunalas
- Midada dal dretg da locaziun: sutlocaziun
- Midada dal dretg da locaziun: disditga pervia d'in agen basegn
Sche las votaziuns fissan gia stadas il prim da november, pia trais emnas avant la dumengia da votaziun, fissan duas da las fatschentas federalas vegnidas acceptadas dal suveran svizzer – tar la midada dal dretg da locaziun: sutlocaziun èsi fitg stretg. La segunda proposta en connex cun il dretg da locaziun e la cumplettaziun da las vias naziunalas avessan fatg naufragi. Quai mussa la segunda retschertga da l'institut Gfs Berna per incumbensa da la SRG SSR.
Sustegn sa reducescha per la finanziaziun unitara da las prestaziuns da sanadad
Ina maioritad da 54% da las persunas dumandadas votassan plitost u segir per la finanziaziun unitara en il sectur da la sanadad. 37% èn s'exprimids plitost u cleramain cunter. 9% èn anc indecis. I dat in cler trend en direcziun da Na, tuttina quintan anc 66% dals dumandads che la proposta vegn acceptada a l'urna. Oravant tut ils aderents da la Partida socialdemocratica e persunas senza colliaziun cun ina partida èn cler cunter la proposta. Gea din oravant tut persunas che suondan il Center u la Partida liberaldemocratica. Quai correspunda a las parolas da las partidas naziunalas.
Oravant tut en la Svizra franzosa è la populaziun critica envers la finanziaziun unitara da las prestaziuns da sanadad. Era sa mussa che las dunnas èn vegnidas pli criticas envers la proposta, cumpareglià cun ils umens.
Situaziun da pat tar la cumplettaziun da las vias naziunalas
Tar l'emprima retschertga èn 51% dals dumandads stads per la proposta d'eliminar stretgas sin divers trajects da las vias naziunalas. In mais pli tard è quai dumber sa reducì a 47% e 51% èn encunter. Cun resguardar il sbagl statistic resulta pia ina situaziun da pat. Auter vesi ora tar la dumonda sch'ins quinta che la proposta vegn acceptada ils 24 da november. Alura quintan 75% dals participants e da las participantas che la proposta vegn acceptada.
En egl dat era che cunzunt umens, persunas cun pajas pli grondas, persunas che vivan en territoris plitost rurals e persunas che fidan a la regenza approveschan la fatschenta. Lur cuntragruppas sajan pli criticas envers il project. Ina clera differenza datti era tar las partidas. Aderents da la sanestra èn plitost cunter la cumplettaziun da las autostradas. Persunas che sustegnan las partidas burgaisas èn persuenter.
Situaziun da pat per la midada da sutlocaziun
Il project dal dretg da locaziun per la sutlocaziun fiss vegnì acceptà l'entschatta da november cun 50% per, e 47% encunter. Era qua munta quai – resguardond il sbagl statistic – ad ina situaziun da pat. I dat dentant in cler trend envers in Na. Il project ha pers entaifer in mais 23 puncts procentuals sustegn.
Sustegn survegn la proposta d'aderents da la PPS e PLD. Cuntrari a l'emprima retschertga n'èn aderents dals Verdliberals betg pli per la fatschenta. Cleramain encunter èn ils aderents dals Verds e da la PS.
Plinavant dat en egl che persunas pli giuvnas èn plitost encunter e persunas sur 40 onns plitost persuenter. Gea din era quels cun las pli autas pajas e quels che na vivan betg en la champagna.
Trend ad in Na tar la disditga pervia d'in agen basegn
Tar la fatschenta da la disditga pervia d'in agen basegn n'è la situaziun sa midada da la situaziun da pat tar l'emprima retschertga ad in Na da 53% da las participantas e dals participants, be 44% schessan Gea. E 52% da las persunas dumandadas partan dal fatg che la proposta fa naufragi ils 24 da november.
Cunter la fatschenta èn persunas dal spectrum politic sanester, sco era persunas giuvnas, sut 40 onns e persunas che vivan en citads. En la Svizra taliana datti era in trend ad in Na, stan uss è ina stgarsa maioritad anc per la midada dal dretg da locaziun en connex cun la disditga pervia d'in agen basegn.
