Ils 18 da zercladur vegnan ils Svizzers e las Svizras puspè clamads a l'urna. Sin nivel federal datti trais votaziuns:
- Tariffa da taglia minimala per concerns gronds internaziunals
- La lescha davart la protecziun dal clima
- La lescha da Covid-19 (terza votaziun)
Sche la votaziun fiss gia stada il prim da matg fissan tuttas trais vegnidas acceptadas dal suveran svizzer. Quai mussa la retschertga da l'institut Gfs Berna per incumbensa da la SSR SRG.
La participaziun fiss dentant plitost bassa cun 40%, la media dal 2011 fin il 2020 era tar 46%.
Tariffa da taglia minimala per concerns internaziunalas
Il pli cler è il Gea tar la tariffa da taglia minimala per concerns gronds internaziunals. Tenor la retschertga schessan là 84% Gea u plitost Gea. 12% fissan cunter il project da votaziun. En general sustegnan tut las gruppas da la populaziun svizra la lescha, la quota da sustegn è uschia dapertut tar almain 80%. L'opposiziun è là pli gronda tar criticas envers la regenza e persunas che sustegnan la PPS (var 20%). Da las aderentas ed aderents da la PS vulan per il mument suandar be 16% a la parola da Na dals delegads da la PS.
Lescha davart la protecziun dal clima
Ina maioritad clera da 72% avess er vuschà Gea per la lescha davart la protecziun dal clima. 25% vuschassan Na u plitost Na.
Lescha da Covid-19 (terza votaziun)
Tar la terza votaziun davart la lescha da Covid-19 è la vart Gea oravant per 40 puncts procentuals. 68% avessan approvà el l'entschatta da matg, entant che 28% avessan refusà ella.
Passa 50% da las persunas ch'èn pli datiers da las partidas PS, Verds, PVL, AdC e PLD han inditgà da segir nudar in Gea tar questa lescha.
Auter tar persunas che han in'affinitad per la PPS: ellas èn s'exprimidas per gronda part cunter la lescha da Covid.
