Ils 9 da zercladur èn Svizzers e Svizras puspè clamads a l'urna. Sin nivel federal datti quatter votaziuns:
- Iniziativa per distgargiar da las premias (pro/contra)
- Iniziativa per premias pli bassas (pro/contra)
- Iniziativa per la libertad e l'integritad corporala
- Lescha federala davart in provediment d’electricitad segir cun energias regenerablas (pro/contra)
Sche las votaziuns fissan gia stadas ils 19 d'avrigl, pia set emnas avant la dumengia da votaziuns, fissan trais da las fatschentas federalas vegnidas acceptadas dal suveran svizzer – l'iniziativa per la libertad e l'integritad corporala avess fatg naufragi. Quai mussa l'emprima retschertga da l'institut Gfs Berna per incumbensa da la SSR SRG.
La retschertga na mussia, tenor Gfs, anc nagina prognosa, i saja la situaziun actuala, a l'entschatta da la fasa principala en il cumbat da votaziun. Il resultat final dependia fitg da la mobilisaziun entras las singulas campagnas.
Iniziativa per distgargiar da las premias
Ina maioritad da 56% da las participantas e dals participants avessan ditg Gea a l'iniziativa per distgargiar da las premias – 40% èn encunter quella. La retschertga mussa ina clera polarisaziun dal spectrum politic. Aderents dals Verds e da la Partida socialdemocratica èn cleramain per l'iniziativa. Tgi ch'elegia plitost la PPS, la PVL u la PLD è per gronda part encunter. Tar l'Allianza dal Center è ina pitschna maioritad encunter l'iniziativa.
Ina gronda differenza datti era tar las pajas. Persunas cun entradas plitost bassas èn per gronda part per l'iniziativa, persunas che fadian bain èn encunter.
Iniziativa per premias pli bassas
Era la segunda iniziativa che pertutga ils custs da sanadad fiss vegnida acceptada mez avrigl da la populaziun svizra. Quai dentant betg uschè cler, be 52% èn stads per l'iniziativa – 41% encunter. Plinavant han ils participants e las participantas prognostitgà che l'emprima iniziativa vegnia acceptada era il zercladur. Tar questa iniziativa per las premias pli bassas quintan 55% dals dumandads ch'ella fa la finala naufragi a l'urna.
L'iniziativa vegn sustegnida da 63% dals aderents da l'Allianza dal Center – ch'ha era inoltrà l'iniziativa. Auter che tar ils Verds na chatta l'iniziativa dentant nagliur ina maioritad. L'iniziativa survegn il pli grond sustegn da persunas che n'èn betg affiliads ad ina partida u ch'èn criticas envers la regenza – in mussament che questa gruppa n'è era betg cuntenta cun il sistem da sanadad.
Iniziativa per la libertad e l'integritad corporala
Ina gronda part da la populaziun svizra refusescha questa iniziativa. Be 27% fiss ils 19 d'avrigl stada per ella. Oravant tut la gronda part da 55% che din gia uss «segir Na» mussa che l'opiniun da bleras e blers è gia fatga en chaussa.
Lescha federala davart in provediment d’electricitad segir cun energias regenerablas
In maletg cuntrari a l'iniziativa per la libertad e l'integritad corporala sa mussa en connex cun la votaziun per las midadas en la lescha d'energia. 75% dals participants e da las participantas da la retschertga èn per las adattaziuns da las leschas d'energia e dal provediment d'electricitad.
Tar questa votaziun datti in cler maletg tar las posiziuns politicas. Be ils aderents da la Partida populara svizra èn plitost encunter la lescha (48% Na envers 46% Gea). Tar tut las ulteriuras partidas è la maioritad per las midadas.
Participaziun
Ils 19 d'avrigl han 46% dals participants e da las participantas da l'emprima retschertga da Gfs Berna inditgà ch'els veglian ir a votar ils 9 da zercladur. Quai è in zic sut la media dals davos 10 onns (47,1%). Tenor Gfs Berna vegnia questa cifra a s'augmentar en il decurs dal cumbat da votaziuns. I vegn spetgà in participaziun en la media u sur la media.
Oravant tut tar la gruppa da persunas ch'è critica envers la regenza han blers inditgà da vulair votar (63%). Medemamain vulan bleras persunas che fadian bain ir a votar (68%).