La lescha d'energia destrueschia la natira e flaivlentia ils dretgs democratics. Da quel avis è la Fondation Franz Weber e l'uschenumnà comité da natira. Ensemen han els preschentà mardi ils arguments cunter la lescha d'energia, sur da quella ch'il suveran svizzer decida ils 9 da zercladur a l'urna.
La lescha d'energia simplifitgeschia da runcar guaud e da destruir biotops protegids. Per far la midada energetica stoppians spargnar energia, di il comité na che vul en pli dapli indrizs solars sin bajetgs.
D'in'autra opiniun èn 18 organisaziuns da l'ambient svizras. Per ellas è la nova lescha d'energia planisada in element central per la protecziun dal clima.
La nova lescha d'energia reglescha nua ch'implants d'energia regenerabla possian vegnir schlargiads e nua betg. Ed ella prevesa d'augmentar la producziun d'electricitad or da funtaunas regenerablas sin 37 uras terawatt enfin il 2050. Il suveran svizzer votescha ils 9 da zercladur davart la nova lescha d'energia.