Tgi che daventa victima da violenza ha il dretg da survegnir sustegn. Latiers tutgan tenor la Lescha federala davart l'agid a victimas – ultra da las prestaziuns finanzialas – tranter auter er l'agid medicinal ed il sustegn psicologic. Il Cussegl federal vul ussa engrondir questas prestaziuns spezialmain per victimas da violenza a chasa e violenza sexuala. En sia sesida dals 9 d'october 2024 ha el perquai avert la consultaziun davart ina revisiun parziala correspundenta da la lescha. El propona da meglierar l'agid medicinal e l'access a la documentaziun da la medischina legala. Il Cussegl federal realisescha uschia differentas moziuns dal parlament.
Garantir l'access a l'agid da la medischina forensica di e notg
Victimas da violenza ston suenter l'act savens vegnir tractadas directamain medicinalmain. Ultra da quai èsi impurtant da documentar uschè svelt sco pussaivel las blessuras ed ils fastizs corporals en moda forensica. Per che quai saja realisabel èsi central ch'ils obstachels sajan uschè bass sco pussaivel per l'access a l'emprim provediment tras persunal spezialisà medicinal. Ils chantuns duain perquai garantir en l'avegnir ch’i stettian a disposiziun avunda purschidas e che l'access ad in tractament spezialisà saja garantì da di e da notg.
Plinavant propona il Cussegl federal che l'access a la documentaziun da la medischina legala duaja esser gratuit en l'avegnir. La victima duai pudair pretender la documentaziun da la medischina legala independentamain dal fatg sch'ella denunzia il delinquent u betg. La documentaziun po vegnir duvrada pli tard sco med da cumprova, quai che pudess avair in effect positiv sin la quota da denunzia e sin il dumber da las condemnaziuns penalas.
Chantuns duain infurmar davart purschida d'agid
Per che las mesiras hajan in effect, ston las victimas enconuscher lur dretgs ed ils posts da consultaziun per l'emprim agid medicinal. Il Cussegl federal vul perquai fixar explicitamain en la Lescha federala davart l'agid a victimas ch'ils chantuns duain infurmar adequatamain davart lur purschidas d'agid. La consultaziun da la revisiun parziala da la Lescha federala davart l'agid a victimas dura fin ils 24 da schaner 2025.
