Violenza en l'educaziun pon ins categorisar en duas furmas. Violenza psichica e violenza fisica. La violenza fisica è simpla da vesair. Sch'ins fa corporal mal a l'uffant, è quai violenza fisica. La violenza psichica è per exempel sch'ins sbragia cun l'uffant u era sch'ins ignorescha l'uffant. En tut las furmas da violenza vegn la persunalitad da l'uffant ferida.
Mintga acziun che ferescha la persunalitad da l'uffant è ina furma da violenza.
Educar senza violenza è tuttina pussaivel. Tenor la cussegliadra da geniturs pon ins er esser sever senza esser violent. Impurtant saja d'avair clers cunfins e da trair consequenzas. Las consequenzas pon esser positivas u negativas per ils uffants. Per exempel pon ins trair consequenzas sche l'uffant perda temp, lura na datti betg pli in'istorgia da buna notg. Sche l'uffant è en temp pronts per ir a letg, datti in'istorgia. Perencunter na duess ins betg pli educar cun chastis u recumpensas.
Cun recumpensas n'emprenda l'uffant betg da far meglier. El emprenda be ch'el survegn regals.
En ina educaziun senza violenza datti trais sentiments che l'uffant na duess betg sentir: vargugna, culpa e dolur. Per pudair sa tegnair vi da quest princip na duess ins betg crititgar l'uffant direct mabain ses cumportament.
Tgi che dovra agid tar l'educaziun po er ir per cussegls tar la cussegliaziun da geniturs. Quai è era pussaivel en furma anonima. Il post da cussegliaziun ha in'obligaziun da discreziun e na po betg dar vinavant infurmaziuns ad auters. Nagin ha d'avair tema ch'ins perdia l'uffant sch'ins va per agid.
