Era sche las dunnas vegnan numnadas explicitamain en il titel da l’acziun «16 dis cunter violenza a chasa e cunter violenza a dunnas», stettian quests dis era per umens ed uffants. Quai di Anna Seraina Arquaint Sonder ch’è part dal comité d’organisaziun ed era commembra da Zonta, in'organisaziun da dunnas. Diversas organisaziun da dunnas han infurmà davart l’acziun ed era davart las pussaivladads ch’ils pertutgads e las pertutgadas han.
Gist avant Nadal è la violenza la pli gronda da tut l'onn. Tar la festa d’amur han persunas aspectativas ed uschia poi dar conflicts.
Acziuns durant ils 16 dis cunter violenza a chasa ed a dunnas
Intginas pasternarias en il chantun Grischun dattan ora il paun en stgarnuz cun scrit si «Violenza a chasa na vegn betg en noss stgarnuz». A Cuira èn giu plaun chalzers oranschs cun si intgins pleds, mintga chalzer raquinta ina istorgia d’ina persuna ch'ha patì da violenza psichica. En pli traglischan divers edifizis a Cuira en oransch. En tut il chantun datti stans d’infurmaziun dal club Soroptimist.
Vitiers datti intgins events durant l’emna. Per exempel in poetry slam u in lavuratori cun giuvenils per mussar co ch’ina relaziun da partenadi giuvenila po funcziunar bain. En pli raquintan pertutgads e pertutgadas da violenza psichica en ina relaziun.
Violenza psichica
Violenza psichica è colliada ferm cun communicaziun, e signifitga da duvrar meds verbals per dominar. Tar violenza psichica po ina persuna vegnir controllada fermamain, vegnir crititgada, isolada u sabotada. Era la schigliusia po manar a violenza psichica. La psicologa Anna Seraina Arquint Sonder di che questa maniera da controllar insatgi po era esser subtila, uschia ch’il visavi na realiseschia gnanc quai. Da la violenza psichica poi era vegnir a violenza corporala, quai saja in circul vizius.