En cas d'ina catastrofa han ins per regla fitg pauc temp da reagir. Per avertir la populaziun datti en Svizra radund 7'200 sirenas, mobilas e fixadas.
Per far la segira che quellas funcziunan en cas d'urgenza vegnan las sirenas testadas ina giada ad onn durant l'emprima mesemna dal favrer. La mesemna, ils 5 da favrer, è pia sco emprim d'udir l'uschenumnà «alarm general» a partir da las 13:30 fin las 14:00. Davent da las 14:00 fin il pli tard las 16:30 suna en regiuns periclitadas – che sa chattan sut in mir da fermada – lura er anc «l'alarm d'aua».
Refrestgentai Vossa savida en connex cun ils alarms cun quest quiz:
App «Alertswiss» dat orientaziun tar l'alarm
Sper las sirenas vegn era testada l'app «Alertswiss». Quella duai infurmar la glieud via notificaziuns da push sin il smartphone davart la situaziun da catastrofa e tge ch'è da far cura che las sirenas sunan. Era sur la pagina d'internet da «Alertswiss» pon ins chattar questas infurmaziuns. Blers na sappian tenor l'Uffizi federal da la protecziun numnadamain betg tge far cura ch'ins auda in alarm da sirena.
Tenor las autoritads hajan l'app e la pagina d'internet dapli pussaivladads d'infurmar la populaziun en cas d'urgenza. Ditg era quai mo pussaivel via las sirenas u il radio. Persunas che n'audan betg sajan excludas dal sistem da sirenas senza chanals sco l'app u pagina d'internet. Tut ils chantuns svizzers ed il principadi da Liechtenstein han sa participà al nov sistem d'alarmar e d'infurmar la populaziun en cas da catastrofas.