En l'avegnir possian ins infurmar via sirenas ed il medem mument er via l'app «Alertswiss» e sin la pagina d'internet latiers davart catastrofas. Quels chanals hajan dapli pussaivladads d'infurmar la populaziun. Il nov sistem po numnadamain er avertir la populaziun senza far in alarm da sirena. Tut ils chantuns svizzers ed il principadi da Liechtenstein sa participeschan al nov sistem d'alarmar e d'infurmar la populaziun en cas da catastrofas.
Fin uss: sirenas e radio
Il sistem d'alarm da fin uss infurmescha la populaziun svizra via sirenas e radios davart catastrofas. Tenor l'Uffizi federal da la protecziun da la populaziun funcziunia quai sistem. El n'adempleschia però betg pli ils basegns d'ozendi: Ina gronda part da la populaziun dovria en il mintgadi cunzunt meds da communicaziun mobils. Vitiers vegnia ch'ina gronda part da la populaziun na sappia betg co reagir sin in alarm d'ina sirena. Ed er persunas che n'audan betg sajan excludas dal sistem da sirenas che vala fin uss.
RR novitads 12:00