Per alarmar ils abitants en situaziuns da privel datti en mintga vitg sirenas. Ina giada per onn vegnan quellas mintgamai testadas. Quai è per il pli la suletta giada ch'ins auda las sirenas. Mo tge muntan ils differents tuns e tge èsi da far?
Ina giada per onn vegnan las sirenas en l'entira Svizra testadas. Quai è mintgamai la mesemna da l'emprima emna da favrer a las 13.30. Cun ils tests vegn guardà che las sirenas funcziunan lura era en cas da privel. Las medias orienteschan mintgamai ordavant davart il test, uschia ch'ins na piglia betg tema cura ch'i tiba. È la sirena d'udir insacura auter, lura èsi vairamain da reagir.
Ils differents tuns - differents alarms
I dat dus differents tuns da sirena en Svizra. In è per l'alarm general e l'auter è l'alarm d'aua. Tut tenor alarm èsi da reagir auter.
L'alarm general ha in tun che va regular si e giu. Il tun cuzza mintgamai ina minuta. Tranteren datti lura ina pausa da duas minutas.
Sche quai alarm tuna, lura èsi immediat da tschentar en il radio. Al radio vegni ditg, pertge ch'i dat l'alarm e tge ch'igl è da far. Era en cas ch'i fiss in alarm fauss vegn quai communitgà al radio.
Sco segund èsi da far quai ch'è vegnì ditg en il radio.
E sco terz èsi era d'infurmar ils vischins. I pudess esser che quels n'han betg udì l'alarm.
Ditg curt: l'alarm dat il cumond da tadlar radio e da s'infurmar tge ch'è capità.
L'alarm d'aua tuna auter che l'alarm general. Igl è in tun constant da 20 secundas, suandà d'ina pausa da 10 secundas. Quai sa repeta 12 giadas.
Quai alarm vegn duvrà en lieus che giaschan pli bas ch'in lai da serra. Quai en cas ch'in mir rumpess e l'aua dal lai pudess innundar ils lieus. Sche quai alarm tuna, lura èsi immediat da bandunar il lieu ed ir en lieu nua che l'aua na po betg tanscher. Per exempel en ina part pli auta dal vitg.
Sco segund èsi puspè da tadlar radio. Là vegn infurmà tge ch'è capità e tge ch'igl è da far sco proxim.
Sch'ins abita en in lieu nua che quai po capitar, lura èsi impurtant da s'infurmar. La vischnanca reparta regularmain broschuras d'infurmaziun nua ch'infurmeschan nua ch'igl è dad ir en cas dad in alarm d'aua.
Co eri avant il temp da las sirenas?
Era avant ch'i deva sirenas vegniva alarmà ils abitants da privels, sco per exempel cura ch'i brischava insanua. Augustin Killias, l'iniziant dal museum da Laax, raquinta co ch'i vegniva alarmà pli baud.
Co eri avant il temp da las sirenas?
Era avant ch'i deva sirenas vegniva alarmà ils abitants da privels, sco per exempel cura ch'i brischava insanua. Augustin Killias, l'iniziant dal museum da Laax, raquinta co ch'i vegniva alarmà pli baud.