Duas da las 338 sirenas n'han betg funcziunà en il chantun Grischun. I sa tracta da duas sirenas per l'alarm general. Ils alarms d'aua han tuts funcziunà. Quai resulta da l'emprim'evaluaziun dals tests da sirenas fatga da l'uffizi chantunal per militar e protecziun civila.
Parallel cun il test da sirena publitgeschan ils chantuns in messadi sin l'app «ALERTSWISS». Quel messadi na fa naginas ramurs. En cass d'in dretg alarm faschess dentant er il handy las ramurs d'ina sirena (sch'ins ha installà l'app).
Tge far tar in alarm?
En Svizra datti var 5'000 sirenas staziunaras e 2'200 sirenas mobilas. Sch'ins auda ina da quellas, èsi pussaivel ch'i sa tracta d'in privel per la populaziun. En in tal cas ston ins reagir immediat. Tar l'alarm general ston ins subit tadlar radio u s'infurmar sur l'app «ALLERTSWISS» per vegnir a savair co agir. La app porscha infurmaziuns specificas da las regiuns ch'interessa ad in.
Là survegnan ins l'infurmaziun, sch'i dat eventualmain in'evacuaziun. Sch'i dat in'evacuaziun, lura duess ins immediat tschertgar il lieu d'urgenza e là survegn ins ulteriuras instrucziuns da la vischnanca, di Markus Walser da la polizia chantunala dal Grischun.
Tschalers da protecziun vegnan duvrads principalmain en cas d'ina erupziun da la guerra e betg en cas d'in alarm general.
Sch'ins auda percunter l'alarm d'aua munta quai ch'i dat in privel direct sut in mir da fermada. En quest cas ston ins subit bandunar il territori da privel. Ils differents plans da fugia èn da chattar tar las vischnancas.