Las decisiuns curt e cumpact
- Silvia Hofmann è vegnida elegida sco nova presidenta. Ella succeda a Franz Sepp Caluori. Vicepresidenta è Valérie Favre Accola.
- Via da Segl e Plaun da Lej duai spert vegnir pli segira. Il Cussegl grond ha surdà ina incumbensa a la regenza.
- La Banca chantunala duai dar giu dapli daners al chantun. Il chantun lavura gia vid ina survista da l'entira situaziun.
- Il parlament ha prendì per enconuschientscha in rapport davart il turissem. Quel ha analisà la collavuraziun tranter economia e turissem en il Grischun.
Via da Segl e Plaun da Lej duai vegnir pli segira
La via tranter Segl e Plaun da Lej en l'Engiadin’Ota duai vegnir pli segira. La via è numnadamain adina puspè pertutgada da bovas e crudadas da crappa. Cun 85 cunter 17 vuschs tar 5 abstenziuns ha il Cussegl grond decidì da surdar a la regenza in’incumbensa dal deputà Stefan Metzger (PPS).
Concret duai il Chantun procurar che la via vegn pli segira. Tar cas critics sin la via duai la communicaziun vegnir meglierada. Plinavant duai la regenza elavurar ina proposta per in tunnel e surdar quella al Cussegl federal. Sco davos punct duai la regenza far tut quai entaifer in onn – malgrà che la regenza ha resalvas che quai giaja uschè svelt.
Dapli raps da la banca chantunala
Il Cussegl Grond vul che la Banca Chantunala Grischuna dat giu dapli daners, en furma d'indemnisaziuns al chantun Grischun. Cunquai ch'il chantun ha ina cumpart da dapli che 80% da la Banca chantunala, haja el uschia in pled en il chapitel.
En pli duai il chantun giuditgar independent e regularmain il risico da la banca. Cun quai ha la regenza gia cumenzà. Enfin la stad 2025 duai ella avair ina survista da l’entira situaziun da la Banca Chantunala Grischuna.
Approvà lescha da giurisdicziun administrativa
A partir da l’auter onn èsi pussibel d’inoltrar dumondas per e-mail a tut las dretgiras en il chantun Grischun. Il Cussegl grond ha approvà la revisiun da la lescha davart la giurisdicziun administrativa. Questa midada saja impurtanta en vista a la nova Dretgira superiura. Fin uss è la communicaziun electronica mo pussibla cun la Dretgira chantunala e las dretgiras regiunalas. L’auter onn vegnan la Dretgira administrativa e la Dretgira chantunala lura sut in tetg a la Dretgira superiura.
Rapport da turissem è sut tetg
Co collavura l'Uffizi per economia e turissem cun partenaris turistics? Questa dumonda respunda in rapport ch'il Cussegl grond ha discutà e prendì per enconuschientscha gievgia suentermezdi. Il rapport da la Scol'auta da Lucerna ha analisà la collavuraziun tranter l'uffizi e las organisaziuns turisticas e fatg propostas, co collavurar meglier. La regenza ha tranter auter tratg la conclusiun che las cunvegnas da prestaziun cun organisaziuns turisticas duain vegnir examinadas regularmain – e betg simplamain vegnir prolungadas automaticamain.
Sper quai vul la regenza en l'avegnir er communitgar meglier, co ella promova il turissem e tge incumbensas ch'ella surdat. In emprim pass en questa direcziun è gia vegnì fatg il matg cun preschentar ina strategia turistica cumplessiva . Il rapport ha la Scol'auta da Lucerna fatg sin basa d'ina incumbensa dal Cussegl grond dal 2019.
Silvia Hofmann è nova presidenta dal Cussegl grond
Cun 70 onns è Silvia Hofmann vegnida elegida sco otgavla pli auta Grischuna. Il parlament ha elegì la dunna da Cuira cun 106 da 110 vuschs valaivlas. Ella succeda a Franz Sepp Caluori dal Center Grischun. La Socialdemocrata è dapi il 2018 deputada en il Cussegl grond. Sco vicepresidenta è Valérie Favre Accola da la partida populara vegnida elegida.
Davos pled da Franz Sepp Caluori sco president
La sessiun d'avust dal Cussegl grond è vegnida averta da Franz Sepp Caluori. Quai è sta ses ultim pled d'avertura. Il deputà dal Center Grischun guarda enavos sin in onn presidial collegial. Ed adequat a sia lavur sco gastronom haja el sentì l'ospitalitad.
Jau hai sentì l'ospitalitad dapertut: Tar ils umans, en ils vitgs, en las valladas, sin las muntognas.
En ses pled ha Franz Sepp Caluori raquintà da blers inscunters, saja quai cun la glieud, uvestgs ubain tar il forum mundial d'economia a Tavau. El ha er fatg attent ch'i saja impurtant per deputadas e deputads da betg perder il palantschieu sut ils pais.
Co vai cun noss Cussegl grond? Cun agid d’ina massa dumondas emprendain nus ad enconuscher nossas cusseglieras e noss cussegliers d’ina nova vart.