Il turissem grischun è ina pitga da grond'impurtanza per l'economia publica grischuna. La strategia turistica ch'è ussa sin maisa mussia la tenuta da la regenza e stgaffeschia in rom d'orientaziun per tut las parts participadas, scriva la regenza en ina communicaziun.
Maletg dal futur vegn concretisà
Il turissem duai surpigliar en il futur ina rolla directiva en il turissem alpin. La regenza formulescha perquai il suandant maletg dal futur:
Quest maletg dal futur concretisescha la regenza cun finamiras strategicas a vista mesauna.
Las finamiras strategicas 2030
- L'effizienza d'interpresas è meglra en il turissem grischun e cooperaziuns èn etablidas.
- Las abilitads da s'adattar a midadas ed ad innovaziuns èn pli fermas.
- Las cuntradas natiralas e culturalas han dapli valur tras prestaziuns turisticas.
- Il bainstar da la populaziun e sia identificaziun cun il turissem èn francads.
- La cumpetitivitad è pli gronda ed ulteriuras quotas dal martgà èn cuntanschidas.
- Ils giasts restan en media pli ditg.
- Il success s'exprima tras dapli valur e tras plazzas da lavur segiras sco er stgaffidas da nov.
Dar impuls
Cun la strategia turistica vul la regenza grischuna dar impuls, senza dar instrucziuns.
Nus stgaffin il rom e dain ils impuls per in agir economic per l'innovaziun en il turissem. Per la realisaziun è dumandada atgna responsabladad da l'economia privata e dal maun public.
La strategia turistica è vegnida elavurada en collavuraziun cun represchentantas e represchentants da l'economia turistica dal Grischun. Ella vala sco punct da partenza per in ulteriur process: in process che duai transfurmar ils tratgs fundamentals da la strategia en mesiras concretas. La strategia turistica na descrivia perquai betg mo las finamiras, mabain duai en emprima lingia er stimular e dar impuls, scriva la regenza plinavant.
Basa per success persistent
Tut en tut haja il Grischun ina buna posiziun sin il martgà. Las midadas dal clima, il svilup demografic e social cun lur consequenzas per il martgà da lavur, sco er la digitalisaziun pretendian dentant da reponderar ils models usitads e da collavurar pli fitg a moda interdisciplinara, uschia la regenza. La regenza envida perquai ils purtaders da las prestaziuns turisticas, las federaziuns, las vischnancas e l'administraziun chantunala da vesair las schanzas e las sfidas, quai per che la branscha possia s'adattar a las midadas e possia sa sviluppar vinavant en direcziun d'in turissem persistent da tut onn.
Il Cussegl grond aveva surdà a la regenza l'incumbensà per elavurar ina strategia turistica per il Grischun la stad 2021.
