Müstair ha retschavì oz Silvia Hofmann, la pli auta Grischuna, dapi sia elecziun sco presidenta dal Cussegl grond. Cun musica, pleds ed era cun l'in e l'auter «cin-cin».
Che la politicra ha festegià sia elecziun en la Val Müstair, ha da far cun sias ragischs. Silvia Hofmann è numnadamain naschida a Müstair ed ha passentà en la val ils emprims trais onns da sia uffanza. Surtut paraints e cuntschaints èn perquai vegnids a beneventar la presidenta nov-elegida durant il cortegi tras il vitg da Müstair e per in aperitiv sin Plaz Grond per tut la populaziun.
La segunda en famiglia
Suenter che ses barba Flurin Conrad era vegnì elegì dal 1968 sco pli aut grischun, segua uss sia niaza en il medem uffizi. Tant la sora Cornelia Meiners sco er il frar Benno Conrad èn superbis da lur sora pli veglia, Silvia Hofmann.
Surtut noss bab fiss fitg superbi da l'elecziun da Silvia sco pli auta grischuna.
Per la politicra da 70 onns è la festa surtut stada colliada cun bleras regurdientschas e cun in vegnir a chasa, uschè Silvia Hofmann suenter in di pulpì cun musica, chant e pleds festivs.
Dapi venderdi ha il Grischun duas dunnas a la testa
Cun 70 onns è Silvia Hofmann vegnida elegida pli auta Grischuna. Ella succeda a Franz Sepp Caluori dal Center Grischun. La socialdemocrata è dapi il 2018 deputada dal Cussegl grond. Sco vicepresidenta è vegnida elegida Valérie Favre Accola da la partida populara.
![Zwei Frauen mit Blumensträussen lächelnd.](https://www.rtr.ch/static/cms/images/960w/2832cd.jpg)
Ina vita per dapli egualitad
Silvia Hofmann ha deditgà ina gronda part da sia vita a l'engaschi per egualitad, dal 2003 fin il 2016 ha ella er manà il post da stab per egualitad da las schanzas dal chantun Grischun. Sper quai ha ella er fundà il 1997 la fundaziun da l'archiv cultural da dunnas dal Grischun, ensemen Silke Margherita Redolfi.
![Frau](https://www.rtr.ch/static/cms/images/960w/1ec90e.jpg)
Ella ha studegià germanistica, istorgia ed istorgia d’art a Basilea. Bunamain 30 onns ha ella lavurà sco schurnalista libra per revistas e gasettas sco «Annabelle», «Wir Eltern» u per ils magazins dal Tages-Anzeiger u Die Zeit. Tematisà ha ella ils dretgs da dunnas, art, sanadad u era la perscrutaziun medicinala.
Silvia Hofmann abitescha dapi passa 20 onns a Cuira, ha dentant abità en divers lieus en il chantun ed ha sias ragischs en Val Müstair. Perquai vegn questa sonda er fatg la gronda festa per la nova presidenta en Val Müstair.