«Igl è ina tematica fitg fitg impurtanta», ha l'organisatura punctuà. Céline Meury, la sviluppadra regiunala da la Regiun Surselva ha envidà la publicitad a la saira tematica. L'ultima sairada cun il tema energia d'idrogen aveva però carmalà dapli glieud en sala.
Questa giada ha il post gì en mira ils «juniors» activs. Tenor il post da svilup e la scol'auta saja numnadamain ina sfida per vischnancas ed uniuns da motivar persunas giuvnas creschidas da s'engaschar politicamain e socialmain en lur vischnancas. L'invit per la saira è er ì a las suprastanzas communalas. Tut en tut èn la finala 30 persunas sa participadas.
La Lumneziana, Chiara Weishaupt, è ina da las participantas. Sco presidenta da Nextgen Surselva ha ella preschentà l'uniun ch'ina gruppa da giuvens e giuvnas ha fundà il prim da schaner 2024. Nextgen Surselva vul promover la prticipaziun da la giuventetgna a svilup e process politic. «La participaziun è noss pled-clav», ha ditg Chirara Weishaupt. L'uniun è independenta cun e per glieud giuvna interessada a la politica. Ella vul assister, colliar, coordinar ed intermediar il process da furmar in'opiniun.
L'indifferenza, ina sfida generala
Che giuvens e giuvnas creschidas èn ozendi plitost indifferentas envers la politica communala ha Curdin Derungs confermà en ses referat introductiv. Il professer, docent e scienzià d'economia administrativa a la Scol'auta spezialisada dal Grischun è oriund da Vella e creschì si a Domat. El ha però er ditg:
I n'è betg in problem specific sursilvan u insumma da la periferia.
Dapreschent maina Curdin Derungs tranter auter il Surselva Lab, in institut exter da la scol'auta ch'è da chasa tar la Regiun Surselva a Glion. L'indifferenza saja in sfida generala e per garantir che las vischnancas chattan successurs u successuras per las suprastanzas stoppian ins far sforzs specials. Tenor Curdin Derungs dat il plan d'instrucziun 21 da las scolas dapli pais al rom da l'instrucziun civica. I saja in rom decisiv che possia gidar da svegliar l'interess per la politica communala. Per motivar givens e giuvnas creschidas dovria denton trategias, exempels, ina assistenza savida politica pratica ed era il contact direct cun la generaziun giuvna.
Giavischs «naivs» fruntan sin tals etablids
En ina segunda part da la saira han Céline Meury, Curdin Derungs, Chiara Weishaupt e Chantal Bleiker, la manadra dal post per la promoziun da giuventetgna Jugend.gr manà lavuratoris. Durant mintgamai in quart d'ura èn participants e participantas s'approfundads en dumondas centralas. A la fin han ils moderaturs e las moderaturas preschentà lur glistas cun chavazzis da las discussiuns en gruppa. La glista da chavazzins tar la dumonda «Tge impedescha da vegnir activ?» è stada la pli lunga. 20 puncts han ils participants e las participantas chattà.
La glista tar la dumonda tge che stuess midar per che la giuventetgna sa participeschia è stada la pli curta. Tar quella da las mesiras concretas, co e cun tgeninas ch'ins pudessia meglierar la situaziun sco era quella tge tematicas ch'interesseschan la glieud giuvna activa en la politica hai dà mintgamai 11 chavazzins. En ils discurs en gruppa han ins udì che la giuventetgna haja savens giavischs spontans ch'ils «etablids» disqualifitgeschian sco naivs. Sche las autoritads n'adempleschian betg immediatamain quels giavischs, sajan ils giuvens e las giuvnas frustrads e sa sentian malchapids. Promover la chapientscha tranter las generaziuns, infurmar dals process politics e dar pais a la discussiun tranter «seniors e juniors» èn lura er ils dus chavazzins ch'èn sa tratgs sco in fil cotschen tras ils quatter workshops.
