La suprastanza communala ed il parlament da Glion recumondan a votantas e votantas d'approvar ils projects da l'Axpo e da dar ils dretgs da bajegiar per las duas ovras solaras. In'ovra è planisada sin l'Alp da Rueun e tschella sin l'Alp da Schnaus. La Lescha d'energia federala dumonda ina votaziun tar tals projects gronds. Uschia pon las votantas ed ils votants decider sch'els vulan laschar far diever la producenta d'electricitad dal terren public, quai era perquai che la vischnanca è proprietaria dal terren.
Il dus projects da l'Axpo
-
Bild 1 von 2Legenda: Visualisaziun da l'implant planisà sin l'Alp da Schnaus. Axpo -
Bild 2 von 2Legenda: Visualisaziun da l'implant planisà sin l'Alp da Rueun. Axpo
En ils messadis tar quellas votaziuns infurmescha la vischnanca sur dals projects en general e tge ch'è planisà da far per pudair realisar ils implants. Per l'auter enumerescha la vischnanca las indemnisaziuns che duessan vegnir concretisadas en in contract, sch'i dat in Gea a l'urna.
Durant l'orientaziun publica dals 9 da november a Glion aveva il president communal, Marcus Beer, sco era l'Axpo sincerà ch'i dettia in'ulteriura votaziun che pertutga ils detagls dal contract. Da quella na stat dentant nagut en ils messadis.
Tar auters projects sco a Scuol ed a Claustra è la vischnanca gia vegnida cun ils contracts tar las votaziuns.
Tenor Marcus Beer è ils squitsch da temp problematic, la vischnanca da Glion haja pir suenter ch'il messadi era fatg constatà ch'ils contracts cun las cundiziuns stoppian vegnir approvads da las votantas e dals votants. Quai suenter che la vischnanca haja sclerì quai cun il chantun. Uschia votescha Glion ils 26 da november en in emprim pass sch'ins vul da principi laschar eriger ils dus implants solars. Las votaziuns tar ils contracts e las indemnisaziuns suondan insacura l'onn proxim.
Sch'il suveran dat ses consentiment en la votaziun da quest november, planisescha l'Axpo las duas ovras. En il fratemp tschentan la vischnanca e l'Axpo si ils contracts che pertutgan ils dretgs e las indemnisaziuns che vegnan preschentads al suveran en ina segunda votaziun. La vischnanca haja gia contractà las indemnisaziuns cun l'Axpo, i dettia cunfins tar l'energia solara, uschia Marcus Beer. Che Glion haja da votar duas giadas pertutgant las ovras solaras na saja betg schlet, manegia el. Il pievel haja uschia anc ina giada la pussaivladad da dir sche las cundiziuns sajan bunas. E forsa vegnian ins tuttina da contractar in zic meglras cundiziuns.