La vischnanca da Glion vul siglir sin l’Express solar da la Confederaziun. Concret vul ella realisar duas ovras solaras alpinas: Ina sin l'alp da Schnaus e l'autra sin l'alp da Rueun.
«La natira n'è betg pajabla»
Ils 9 da november ha puspè gì lieu ina saira d'infurmaziun davart ils projects a Glion. L'interess è stà grond, la sala è stada plaina. Sco gia tar la saira d'infurmaziun dal settember è la tenuta dal public stada plitost critica.
Entant ch'il president communal ha surtut intunà l'impurtanza finanziala per ils projects, che generassan entradas da radund in mez milliun francs l'onn per la vischnanca, hai dà or dal public be ina contribuziun davart quest tema. Cun quai ch'ils pretschs d'energia sajan creschids en ils ultims onns na saja prudent da fixar l’indemnisaziun. Per il project sin l'Alp Schnaus dessi summas fixadas, per l'Alp da Rueun dessi in’indemnisaziun liada a la producziun.
En la discussiun n'èsi per gronda part dentant betg ì per dumondas finanzialas, ma per dumondas da la natira ed il maletg dals blers panels solars. Cura che la visualisaziun da l'indriz sin Alp Rueun è vegnida mussada èsi vegnì dad aut en la sala. En la discussiun ha ina persuna survegnì applaus per il punct ch'ils blers panels na fissan ina reclama per la regiun turistica, la natira na saja betg pajabla.
L'ultim pled ha il suveran da Glion ils 26 da november tar la votaziun. Sche la populaziun di Gea duajan las dumondas da bajegiar vegnidas inoltradas l'emprim mez da l'onn 2024.
Forz'eletrica per 13'200 chasadas
Sco la vischnanca ha infurmà, vul l'Axpo realisar sin l'alp da Schnaus in'ovra solara cun ina prestaziun da 22 uras gigawatt ad onn. Sin ina surfatscha da 20 hectaras vegniss producì energia per 4'400 chasadas. Per l'Axpo fiss quai gia la terza ovra en Surselva ch'ella vul realisar.
L'entschatta da november ha l'Axpo communitgà ch'ella veglia era construir la segunda ovra solara alpina sin l'alp da Rueun. Quella ovra cuvriss ina surfatscha da 50 hectaras e produciss energia per var 8'800 chasadas.
