La sala trais da la scola a Glion è s’emplenida gievgia saira fin a la davosa plazza. Quai saja fitg legraivel che blera glieud veglia udir tge che planisà ed era s’exprimer en chaussa, ha il president communal da la vischnanca da Glion Marcus Beer ditg suenter la preschentaziun. Dentant votums en favur dals plans da realisar duas ovras solaras, ina sin l’alp da Schnaus e l’autra sin l’alp da Rueun, n'hai quasi betg dà. Era quai saja d’acceptar, quai saja ina part impurtanta en il process democratic, ha ditg Marcus Beer.
Resalvas fundamentalas
Plirs votums da la saira èn stads en ina direcziun sumeglianta. Uschia ha in um da Rueun accentuà, a moda retorica, sche quest maletg d’ina cuntrada plain panels solars saja in bel maletg. La natira saja bler dapli che daners e na possia betg vegnir valitada be a moda pecuniara. Era èsi vegni fatg attent che la regiun vivia dal turissem e talas projects na sajan nagina reclama per la regiun. Las respostas dals responsabels da l’Axpo eran ch’il turissem possia vinavant nizzegiar la surfatscha per exempel per far turas da skis. Da vart da la vischnanca da Glion è l’argument principal ch’ins dovria la finala entradas pertge la situaziun finanziala na saja betg uschè buna. Sche tut vegniss realisà a moda optimala alura pudess la vischnanca da Glion quintar cun entradas annualas da dapli ch’in mez milliun francs l'onn.
Tge din las organisaziuns d’ambient?
Autras dumondas da la saira èn stadas en connex cun las organisaziuns d’ambient ed il rapport ecologic. Uschia è vegnì dumandà sch'i saja insumma pussaivel da scriver in rapport ecologic sur talas grondas surfatschas entaifer in temp da sulet in onn. Las experientschas cun tals rapports mussian che quai na saja strusch pussaivel da far en in tal curt temp. Era è vegni admonì e dumandà d’in auter um sch’ins haja ina posiziun da las organisaziuns d’ambient e forsa era ina decleraziun d’intenziun che las ovras planisadas na fruntian betg sin resalvas da las organisaziuns d’ambient. Quai han ils responsabels da l’Axpo e da la vischnanca betg pudì confermar, ma Marcus Beer ha fatg attent che quai saja la discrepanza, atgnamain tuts che veglian energias regenerablas ma betg sin l’agen intschess.
Daco tants projects en Surselva?
Ina da las dumondas, tschentada d’in um pli giuven, è stada daco che tantas ovras solaras sajan planisadas en Surselva. La resposta è stada ch’il sulegl glischia pli savens en Surselva, surtut l’enviern, che per exempel en la Bassa. In auter argument è stà che las ovras d’electricitad Axpo han gia blera infrastructura en Surselva. Uschia dettia gia las raits fermas per manar davent l’energia, grazia a las ovras idraulicas e cun la construcziun da ovras solaras, possian ins anc optimar tut quai. Oliver Hugi, responsabel per tut il solar tar l’Axpo, ha menziunà en sia preschentaziun che l’interpresa haja evaluà passa 200 lieus pussaivels. Restads èn la finala sis e quatter da quels sa chattan en Surselva. L’um ha alura dumandà daco ch’ins n'haja nagins projects en la stiva da sulegl da la Svizra en il Tessin, respostas concretas sin quella dumonda n’hai betg dà.
