Las votantas ed ils votants da Glion duain pudair decider a l'urna sch'els vulan laschar bajegiar la producenta d'electricitad Axpo in grond implant solar sin l'Alp da Rueun ed in sin l'Alp da Schnaus. Suenter ina discussiun da radund in'ura cun dumondas criticas a la suprastanza ed als represchentants da l'Axpo, ha il parlament votà cun 17 encunter 4 vuschs per laschar votar il suveran sch'el vul conceder ils dretgs spezials da bajegiar u betg.
Surtut la cumpatibilitad dals gronds implants solars alpins cun l'economia d'alp ed il turissem han procurà per dubis tar ils purs. Plinavant han plirs parlamentaris crititgà la politica federala che fetschia cun il Solarexpress in squitsch che saja dispitaivel e possia manar a decisiuns prendidas a la svelta che procuran per sbagls. Ils represchentants da l'Axpo han accentuà ch'ils projects custian bler e sajan ina tscherta ristga per l'interpresa. Las emprimas experientschas cun implants solars en territori alpin haja l'Axpo gia fatg cun l'implant solar vi dal mir dal lai da fermada Muttsee en il chantun da Glaruna.
Ils 9 da november 2023 organisescha la vischnanca ina saira da d'infurmaziun davart quels implants en la sala da gimnastica a Glion. Las votaziuns vegnan ad esser il 26 da november 2023. Sche las votantas ed ils votants din Gea, concedan els quels dretgs per la surfatscha maximala da radund 40 hectaras sin l'Alp da Rueun e 20 hectaras sin l'Alp da Schnaus. Quai tenor la decleraziun d'intenziun actuala. Las cundiziuns definitivas per ils dretgs da bajegiar vegnissan contrahadas pli tard. L'Axpo vuless inoltrar la dumonda da bajegiar var mez da l'onn proxim.
Approvà la revisiun parziala da la lescha da charrar sin vias d'alp e guaud
La primavaira passada ha la vischnanca da Glion vulì restrenscher l'access sin las vias d'alp, da funs e da guaud. Quella decisiun e la publicaziun latiers avevan procurà per bleras protestas ed objecziuns encunter il project da la vischnanca. Suenter ch'il parlament aveva ultra da quai renvià la revisiun parziala da la lescha da charrar ils 12 d'avrigl 2023 e suenter ina saira d'infurmaziun furiusa ils 20 d'avrigl a Ruschein, è la vischnanca anc ina giada ida sur ils cudeschs. La revisiun parziala da la lescha da charrar che la suprastanza ha preschentà mesemna saira ha il parlament approvà cleramain cun 22 Geas ed ina abstenziun da vusch.
Per l'auter ha il parlament approvà unanimamain in credit d'impegn da 350'000 francs per realisar in parc da skateboard sin l'areal da sport e temp liber Fontanivas a Glion. La tractanda da deliberar la nova lescha davart il traffic ed il parcar ha il parlament spustà sin la proxima sesida.
