La decisiun da la radunanza da vischnanca è stada la finala clera. Avant ha quai era dà votums che la vischnanca da Tujetsch na saja betg responsabla per la cumpra da parcellas da construcziun, surtut sch’ins resguardia tut las investiziuns che vegnan fatgas u stoppian anc vegnir fatgas, per exempel la sanaziun dal bogn Sedrun. La finala n’han quels arguments betg persvas la maioritad. Uss po la vischnanca sa participar activamain a l’ingiant d’ina da las duas parcellas da l’anteriur hotel Oberalp. La summa da 999’999 francs è la pli auta summa en cumpetenza da la radunanza da vischnanca.
Sin parcella actuala n’ha la vischnanca betg in dabun
La parcella che vegn la fin da mars ingiantada è la parcella gist dasper la via principala cun il numer 1169. Quella na sto betg grond vegnir bajegiada enavos perquai che sin quella era, auter ch’in crest cun material, vegni construì tut quels onns nagut. La segunda parcella (1660), en possess d’ina societad affiliada a la «Prime Elements» la possessura da la parcella 1169, sto vegnir reconstruida e quai sche tut va mal sin cust communal. Sin lezza fa era la vischnanca da Tujetsch valair in dabun e quinta da laschar ingiantar quella uschè svelt sco pussaivel, ha il president communal Martin Cavegn ditg als 40 preschents da la radunanza da vischnanca. Uschia pudess la vischnanca vegnir en possess da omaduas parcellas e realisar en quest lieu spazi d’abitar per indigens. Sche quest plan po vegnir realisà vegn l’ingiant da la fin mars a mussar.
Sin las parcellas vegni a dar ina limita da mobilisaziun
Cun la revisiun da la planisaziun locala vegn quai a dar sin tuttas parcellas in temp da mobilisaziun. Quai munta che la parcella sto vegnir surbajegiada entaifer maximal otg onns. Sco Martin Cavegn ha ditg, vegn la vischnanca a proponer da metter in temp da trais onns sin las duas parcellas da l’anteriur hotel Oberalp. Quai vul dir ch’in futur possessur ha temp trais onns da realisar in project, sche na, ha la vischnanca la pussaivladad da cumprar las parcellas. Quai pudess tut tenor esser in plus per la vischnanca da Tujetsch, uschia ha ditg il president communal.
Plans per abitaziuns per indigens
Il spazi d’abitar pajabel per indigens è stgars en la vischnanca da Tujetsch. Cun la realisaziun pussaivla dal resort Dieni pudess quest spazi d’abitar sa sminuir anc pli fitg. Perquai fiss in project cun abitaziuns per indigens la dretga via per pussibilitar in svilup en vischnanca, accentuescha il president communal Martin Cavegn. En tge furma che quai duai alura vegnir realisà, per exempel en dretg da bajegiar, u cun surdar la realisaziun ad ina cooperativa, quai vegn il suveran da Tujetsch a stuair decider. Ma l’emprim sto la cumpra da la parcella che vegn ingiantada vegnir sut tetg, cun il credit actual è la schanza insumma dada per far quest pass.