Sco ch’i vesa ora il mument na svanescha la ruina amez il vitg da Sedrun betg uschè spert sco sperà. La firma Prime Elements ch'è la possessura da la parcella e ch'avess gì da reconstruir quella na sa tegna betg vi da la decisiun da la Dretgira federala. Quella aveva decidì mez avrigl che la firma stoppia reconstruir la parcella.
Sco il president communal da Tujetsch, Martin Cavegn, ha ditg a RTR lascha la vischnanca ussa far ina offerta per quellas lavurs. Quella offerta trametta la vischnanca suenter a la firma Prime Elements per prender posiziun. Plinavant haja il giurist da la possessura da la parcella pertutgada annullà avant curt temp ses mandat, quai che na fetschia betg pli simpel la chaussa per la vischnanca, uschia Martin Cavegn vinavant.
Cun tegnair en tut las proceduras necessarias quinta Martin Cavegn ch'i pudess anc cuzzar in onn enfin ch'il cas è terminà.
Or da l'archiv:
