Ina da las duas parcellas da l’anteriur Hotel Oberalp ha midà possessur. A l'ingiant da venderdi suentermezdi a Glion è la parcella vegnida vendida per in summa da 1,4 milliuns francs. Cumprà la parcella ha la BEC GmbH domiciliada en il chantun Zug.
Per la vischnanca da Tujetsch che vuleva era cumprar la parcella èsi betg exnum ina trumpada, declera il president communal Martin Cavegn. La vischnanca aveva be pudì sa participar cun 999’999,99 francs a la cumpra e cunquai che la BEC GmbH ha offrì dapli, èsi ì a lezza. Tge che la nova possessura vul far cun la parcella n'ha ella betg vulì tradir ad RTR. Sco la vischnanca da Tujetsch ha infurmà, èsi suenter la revisiun da la planisaziun locala, che dura anc circa dus onns, da surbajegiar la parcella entaifer trais onns.
L’interess per cumprar la parcella da l’anteriur Hotel Oberalp a Sedrun è stà grond. Uschia hajan pliras persunas contactà la vischnanca da Tujetsch l’emna passada ed infurmà da vulair esser presentas a l'ingiant, ha ditg Martin Cavegn, president communal da Tujetsch sin dumonda da RTR.
