Il project per ina nova plazza avant baselgia da Rabius è vegnì preschentà a las vischinas ed ils vischins da Rabius. Cunter la dumonda da construcziun n’èn naginas protestas vegnidas inoltradas, di il president da l’uniun Rabius Anavon. Era la finanziaziun è garantida: Uschia contribuescha l’uniun – la successura dal vischinadi da Rabius – 90’000 francs e la vischnanca da Sumvitg 60’000 francs per il project calculà cun in quart milliun francs. Il rest da la finanziaziun contribueschan fundaziuns, declara Diego Deplazes.
Integrar cultura e tradiziun
La nova plazza duai esser in lieu da sentupada per la populaziun e porscher plazza da sentupada era per occasiuns sco l’emprima communiun, declara Diego Deplazes. Era duai la plazza porscher in plaz adequat per la tabla da commemoraziun dal poet e scribent famus da Rabius, Alfons Tuor. Fin uss è la tabla da commemoraziun da l’autra vart da la via dal quartier a Cavivens. Quella duai en l'avegnir chattar in plaz dasper il begl nov sin la plazza. Era il simbol dal vitg da Rabius – la roda mulin – duai chattar in plaz sin quella nova plazza cadruvi.
In grond project per in'uniun
Per l’uniun Rabius Anavon munta la realisaziun da la plazza nova in grond project. Ella ha inizià il project ed organisà la finanziaziun. La plazza sezza appartegn a la plaiv e lezza surdat quella en dretg da construcziun a la vischnanca da Sumvitg. Lezza vegn era ad esser responsabla per la tgira ed il mantegniment da la plazza.
In punct anc betg sclerì è la realisaziun d’ina tualetta publica. Per ina tala tualetta han plirs convischins ramassà suttascripziuns. La finanziaziun e la decisiun finala è anc pendenta tar la suprastanza communala da Sumvitg. Ma sco Diego Deplazes ha ditg, fiss tar la realisaziun da quest project era gist la pussaivladad dada da realisar quella tualetta publica – la suletta en il vitg da Rabius.
La finamira è da cumenzar las lavurs l’entschatta matg e d’esser a fin sin l’atun – quai sch’ils impressaris han avunda capacitad da realisar quest project, declera Diego Deplazes. El è dentant persvas ch'i vegn a funcziunar e sa legrà gia uss da s’inscuntrar cun las vischinas ed ils vischins da Rabius sin la nova plazza avant baselgia.