Alfons Eduard Tuor è naschì a Rabius ils 17 da schaner 1871 sco tschintgavel da nov uffants da Gion Antoni Tuor e Maria Antonia (nata Contrin). Gia da buob aveva el in bun dun da lingua ed aveva in bun humor. L'atun 1884 cumenza el il la scola chantunala a Cuira nua ch'el ha tranter auter instrucziun tar Gion Antoni Bühler e Giacun Hasper Muoth.
Gia durant ils onns da gimnasi pattiva Alfons Tuor da mal vid ina chomma, in mal ch'accumpogna el si'entira vita. Dapi la naschientscha sto el avair gì ina deformaziun dal chau dal chalun (displasia). Pli tard han ins era anc constattà ina deformaziun da la spina dorsala. Pli tard ha el era diversas operaziuns che fan dentant plitost mender la chaussa. Alfons Tuor ha pattì fin l'ultim da mals cronics.
Frantscha ed Engalterra
Suenter la matura (1891) cumenza el in studi da linguas modernas a Turitg, en spezial franzos ed englais, per part era talian. Gia la primavaira 1892 va Tuor a Paris per frequentar las lecziuns tar Gaston Paris (filolog e medievist) e l'atun è el a la Sorbonne, all'École Pratique des Hautes Études ed a l'Institut Catholique de Paris. Il schaner e fevrer 1893 rapporta el ord la Frantscha per la gasetta Graubündner Allgemeiner Anzeiger. Curt suenter va el en Engalterra nua ch'el instruescha franzos e tudestg.
Turitg
Suenter ses return da l'Engalterra dat Alfons Tuor scola a Stäfa. Ses mal dal calun sforza lura el da chalar. La stad 1895 ha el pliras operaziuns dal chalun, l'emprim a Turitg e pli tard a Cuira. La dumonda davart il pitir che Tuor ha scrit en sia poesia «Allas steilas» (1894) è actuala pir che mai. Er autras poesias da quest temp laschan sentir fermamain las painas dal giuven da 24 onns. Ils mais suenter las operaziuns è Alfons Tuor a chasa a Rabius nua ch'el cuntinuescha cun sias lavurs litteraras e linguisticas.
Dal 1897 fin il 1899 frequenta el quatter semesters a l'universitad da Friburg davart la litteratura franzosa, englaisa e tudestga. Il matg 1898 fa el per la segunda giada part dal pelegrinadi svizzer a Lourdes, danovamain cun la speranza ch'el saja ina da questas persunas che vegnia medegià.
L'enviern 1899-1900 passenta Alfons Tuor en la claustra da Mustér nua ch'el lavura vid l'ediziun dal Magnificat II. Sco gia il cudesch da chanzuns Magnificat I na vegn era quel betg cumprà da las plaivs.
Peiden
Ils proxims onns passenta Alfons Tuor la stad mintgamai a Peiden tar sia sora Josefina e ses cuinà Joseph Vinzens cha mainan il bogn da Peiden. L'onn 1901 cumpara l'ultima collecziun da poesias, «Fluras alpinas». Ils ultims mais da sia vita sforza in'inflammaziun acuta dals gnirunchels da star en letg. Ils 19 da mars 1904 mora Alfons Tuor cun be 33 onns.
Alfons Tuor en emissiuns da RTR:
Telesguard:
Noss chors:
Vita e cretta:
