Ils referents sco Marc Holitscher (Microsoft Svizra), Ladina Caduff (Microsoft Svizra), Bernard Maissen (UFCOM), Reto Gurtner (Arena Alva) e Rudolf Minsch (Economiesuisse) han illustrà aspects centrals da la digitalisaziun ed ils potenzials da l’intelligenza artifiziala. Il Giuven Center Grischun ha organisà l’occurrenza. Il focus: L’intelligenza artifiziala (IA) en la regiun muntagnarda e las schliaziuns digitalas tar l’Arena Alva.
L'intelligenza artifiziala en las regiuns muntagnardas: schanzas e sfidas
En regiuns periferas sco la Surselva haja l’intelligenza artifiziala in grond potenzial, di Marc Holitscher, manader tecnic tar Microsoft Svizra. La glieud haja sur generaziuns rimnà infurmaziuns preziusas che restian savens nunutilisadas. La digitalisaziun da questas datas pussibilitass d’utilisar quellas per applicaziuns innovativas. Cunquai che l'utilisaziun da l'intelligenza artifiziala sa basia sin il pled, crodia la barriera tecnologica per glieud che n'haja enfin ussa betg utilisà quellas applicaziuns.
L'integraziun da l'IA en applicaziuns quotidianas maina tenor Marc Holitscher ad ina democratisaziun da l'access a la tecnologia. Là, nua ch'i vegnivan pli baud pretendidas grondas investiziuns en hardware e savida da spezialists, pon oz vegnir utilisadas infrastructuras existentas e cumonds linguistics simpels per profitar dals avantatgs da la digitalisaziun.
Ins chatta propi ina democratisaziun da l'access a questas pussaivladads, perquai che quai n'è betg mo la lingua, mabain er perquai che ozendi na ston ins betg pli far grondas investiziuns inizialas sco pli baud. Oz è quai pli u main a distanza d'in pled.
Uschia possian interpresas pitschnas e mesaunas per exempel optimar process gia enconuschents en il manaschi cun l’agid da l’IA. Quai per crear ina plivalur en furma da use-cases ed exempels pratics.
Malgrà ils numerus avantatgs cumpiglia il svilup rapid da l'IA era ristgs. In diever responsabel da datas ed ina discussiun critica davart las pussaivladads tecnologicas sajan indispensabels per garantir standards socials e legals, di Marc Holitscher. Interpresas che fan diever da l'IA ston garantir che betg tut quai ch'è tecnologicamain pussibel vegnia er realisà - mabain che normas eticas e giuridicas vegnian resguardadas.
Reto Gurtner: «L'intelligenza artifiziala è la pli gronda revoluziun»
En in mund, nua che soluziuns digitalas daventan adina pli impurtantas, resta Reto Gurtner, il president dal cussegl administrativ da l’Arena Alva, fidaivel a sia rolla sco pionier. En in'intervista recentamain dada ha Gurtner discurrì davart ils svilups e las consequenzas da las tecnologias digitalas tar l’Arena Alva. E sco adina, ha el fatg quai cun sia maschaida caracteristica da vista progressiva e visiunara.
I vegn ad esser ina revoluziun anc pli gronda che quella ch'igl ha dà, cura che l'internet è vegnì inventà.
Gurtner vesa en l'intelligenza artifiziala la pli gronda revoluziun dal temp. En ils proxims tschintg fin sis onns vegnia bler a sa midar dramaticamain. Tgi che na vesia betg quai, manchentia la schanza da sa preparar sin l’avegnir, manegia l’um da fatschenta.
Tuttina è Gurtner era conscient dals privels. Sco cun mintga tecnologia dettia consequenzas positivas e negativas. «Mintga tecnologia porta novas pussaivladads, ed i dependa da nus da nizzegiar quellas e tuttina restar vigilant.» L’intelligenza artifiziala saja sia secretaria, el dovra quella mintga di.