Ina cunvegna internaziunala duai tegnair a mastrin l'intelligenza artifiziala. 18 pajais han suttascrit ella. tranter auter la Germania ed ils Stadis Unids.
Interpresas che sviluppeschan e dovran intelligenza artifiziala duajan far quai uschia che la publicitad e clientas e clients sajan protegids d'abus. La segirtad duai survegnir ina pli auta prioritad.
Las recumandaziuns generalas èn da survegliar ils sistems, sch'els vegnan abusads, e da proteger datas cunter manipulaziun. La directura da l'autoritad da segirtad da cyber americana ha ditg ch'i saja impurtant che la segirezza saja il pli impurtant tar il svilup da novs sistems e che dapli pajais vesian quai. I na duai betg mo ir per coolas funcziuns e quant svelt ch'ellas pon ir sin il martgà.
La cunvegna n'è entant betg lianta per ils pajais ch'han suttascrit ella. Suttascrit la cunvegna han tranter auter ils Stadis Unids da l'America, la Germania, l'Italia e la Gronda Britannia.
La cunvegna è ina da pliras sin l'entir mund ch'emprovan da diriger il svilup da l'intelligenzia artifiziala. L'Uniun Europeica è en quest champ ina pioniera. La Germania e la Frantscha han avant curt suttascrit ina cunvegna che sviluppaders e sviluppadras ston sa tegnair vi d'in codex e sa regular sa sez. Quel vala per uschenumnads models da basa d'intelligenzia artifiziala.